	Á Örnefnasjá Landmælinga Íslands er hægt að skoða yfir 58 000 örnefni úr örnefnagrunni Landmælinga Íslands. Hægt er að skoða örnefni ofan á SPOT-5 gervitunglamyndum en þegar þysjað er í stærri mælikvarða en 1:50 000 taka við loftmyndir frá Loftmyndum ehf sem undirlag örnefnanna. Ábendingar um örnefnasjána eru vel þegnar ornefni@lmi.is.
	Á Kortasjá Landmælinga Íslands er hægt að skoða gögn sem eru byggð á gögnum úr IS 50V gagnagrunni Landmælinga Íslands, Atlaskort í mælikvarða 1:100 000 og SPOT-5 gervitunglamyndir í náttúrulegum litum og innrauðum. Hægt er að leita eftir örnefnum, sjá hnit og mæla vegalengdir. Upplýsingar um IS 50V gögnin eru sóttar jafnóðum í gagnagrunninn. Ekki er hægt að þysja inn lengra en 1:10 000. Örnefnin eru tengd mælikvarða þannig að þeim fjölgar eftir því sem mælikvarðinn stækkar. Búið er að skeyta saman SPOT-5 gervitunglamyndir en myndirnar eru teknar á tímabilinu 2002 - 2007. Myndirnar eru með 2,5 metra greinihæfni. SPOT 5 gervitunglamyndirnar voru keyptar til afnota fyrir íslenska stjórnkerfið af fjölmörgum stofnunum, opinberum fyrirtækjum og sveitarfélögum. Hægt er að þysja gervitunglamyndirnar inn í mælikvarða 1:2 000. Atlaskortin (í mælikvarða 1:100 000) voru upphaflega gerð af dönskum landmælingamönnum á fyrstu fjórum áratugum 20. aldar. Þau voru síðast uppfærð árið 1989 og eru talin meðal fallegustu korta af Íslandi. Kortin er hægt að skoða í mælikvarða allt að 1:10 000. Þeir sem eru með Mac tölvur þurfa að fara inn á adobe.com og uppfæra Flash Player í 10.1.85.3 þá virkar örnefnaleitin á íslenska stafi í Safari og Chrome, í Firefox vantar þ og ð.
	Landmælingar Íslands, ásamt öðrum stofnunum, festu kaup á loftmyndum af Eyjafjallajökli sem teknar voru í júlí 2010. Myndirnar eru bæði í náttúrulegum litum og innrauðar og eru myndirnar af Eyjafjallajökli teknar úr 5700 metra hæð með 40 cm upplausn en Myndirnar af Markarfljótinu eru flognar í 2700 metra hæð með 20 cm upplausn. Fyrirtækið Samsýn ehf sá um myndatökuna og gerði einnig hæðarlíkan úr myndunum.
	Á CORINE vefsjá er hægt að sjá breytingar á landgerðum á milli áranna 2000 og 2006.
	Kortasafn Landmælinga Íslands er merkilegt. Rúmlega 2500 kort hafa verið skráð í safnið. Stærstur hluti safnsins eru kort sem LMÍ hafa gefið út frá því að stofnunin var sett á laggirnar árið 1956 en í safninu eru líka útgáfur annara aðila. Einnig er mikið af kortum frá kortlagningu Dana á tímabilinu 1900 - 1939. Jafnt og þétt er unnið að því að skanna kortin til að tryggja afritun og bæta aðgengi að þeim og búið er að skanna stóran hluta safnsins. Á þessum vef er hægt að fá upplýsingar um kortin en einnig skoða kortin sjálf. Í hverri viku bætast ný kort inn á vefinn, en þau eru birt um leið og skönnun kortanna er lokið. Hægt er að skoða öll kort sem LMÍ eiga útgáfurétt af.
	Mikið af heimildum um legu marka sveitarfélaga á Íslandi er í varðveislu Landmælinga Íslands. Mörkin hafa talsvert breyst á undanförnum áratugum, aðallega vegna sameiningar sveitarfélaga. Því er sumstaðar um að ræða heimildir um mörk sem ekki eru lengur notuð. Til þess að auðvelda aðgengi að þessum gögnum hafa þau verið skönnuð og gerð aðgengileg á vefsíðu stofnunarinnar.
	Á Sveitarfélagaskjánum er hægt að fá ýmsar upplýsingar um sveitarfélög landsins. Það er: Stærð Mannfjölda Íbúaþéttleika Nafn sveitarfélags
	Forritið Cocodati gerir notendum kleift að varpa/reikna á milli hnitakerfa sem eiga við á Íslandi. Þar er einnig að finna forrit sem reikna fjarlægð milli hnita og stefnu, misvísun seguláttar, sýna upplýsingar um GPS jarðstöðvar og sýna vörpunagildi milli hnitakerfa.
	Bæjarteikningar danskra landmælingamanna Á fyrstu árum síðustu aldar teiknuðu danskir landmælingamenn upp marga þéttbýlisstaði og húsaskipan á sveitabæjum. Hluti þessara teikninga hefur verið gerður aðgengilegur og má sjá með því að smella á ferningana á kortinu.