Apríl 2013

Myndin er af Þorvaldseyri og var tekin árið 1904 af dönskum landmælingamönnum. 

Danskir landmælingamenn  störfuðu á Íslandi við landmælingar og kortagerð á árunum 1900 – 1940.

 

Eitthvað hefur vafist fyrir fólki að finna út hvaðan þessi mynd er, en nafn Hlyns Þórs Magnússonar var dregið úr réttum svörum sem voru óvenju fá að þessu sinni.

 

 

 

 

 

 

Mars 2013

Myndin er af Borðeyri og var tekin árið 1993.

Borðeyri stendur við Hrútafjörð sem er lengsti fjörðurinn við Húnaflóa. Borðeyri fékk verslunarréttindi árið 1846 og þar var samfelld verslun til ársins 2008. Sjá má meiri fróðleik á  Bordeyri.is

Nafn Árna Páls Ragnarssonar var dregið úr réttum svörum.

 

 

 

 

 

Febrúar 2013

Myndin er af Vopnafirði og var tekin árið 1958.

Þeir sem vilja fræðast meira um Vopnafjörð geta skoðað heimasíðu sveitarfélagsins.

Nafn Jóns S. Erlingssonar var dregið úr réttum svörum.

 

 

 

 

 

 

 

Janúar 2013

Myndin er af Sauðárkróki og er sennilega tekin á fyrri hluta 20. aldar.

Nafn Reynis Kristóferssonar var dregið úr réttum svörum.

 

 

 

 

 

 

 

 

Desember 2012

Myndin er tekin árið 1955 og er af Þorlákshöfn.

Nafn Þorláks Magnússonar var dregið úr réttum svörum.

 

 

 

 

 

 

 

 

Nóvember 2012

Myndin sem tekin er árið 1994 er af Djúpavogi.

Viljir þú fræðast meira um sögu Djúpavogs smelltu hér.

Nafn Arnars Birgis Ólafssonar var dregið úr réttum svörum.

 

 

 

 

 

 

 

Október 2012

Myndin er tekin 26. júlí 1910

Myndin er af Gljúfurá í Borgarfirði.

Nafn Ingunnar Óskar Árnadóttur var dregið úr réttum svörum.

 

 

 

 

 

 

September 2012

Loftmyndin er tekin árið 1996

Myndin er af Þórðarhöfða. Á alfræðivefnum Wikipedia má sjá fróðleik um Þórðarhöfða.

Nafn Gústavs Magnúsar Ásbjörnssonar var dregið úr réttum svörum.

 

 

 

 

 

 

Ágúst 2012

Loftmyndin er tekin árið 1996

Mndin er af Óspakseyri. Á vefnum www.nat.is má sjá fróðleik um Óspakseyri.

Nafn Reynis Þórs Magnússonar var dregið úr réttum svörum.

 

 

 

 

 

 

Júlí 2012:

Loftmyndin er tekin árið 2000.

Myndin er af Hvalvatni. Á vefnum NAT veiðivefur  má sjá smá fróðleik um Hvalvatn og næsta nágrenni.

Nafn Steingríms Þorbjarnarsonar var dregið úr réttum svörum.

 

 

 

 

 

 

Júní 2012:

Loftmyndin er tekin árið 1996.

Myndin er af Ljótapolli.

Nafn Páls Aðalsteinssonar var dregið úr réttum svörum.

 

 

 

 

 

 

Maí 2012:

Loftmyndin er tekin árið 1991

Myndin er af Hlöðufelli og Þórólfsfelli

Nafn Kristínar Atladóttur var dregið úr réttum svörum

 

 

 

 

 

 

 

 

Apríl 2012

Loftmyndin er tekin árið 1994.

 

Myndin er af Hesteyri við Hesteyrarfjörð í Jökulfjörðum.

 

 Nafn Snorra Grímssonar var dregið úr réttum svörum. Snorri sendi einnig smá fróðleik um Hesteyri og kunnum við honum bestu þakkir fyrir:

„Þessi mynd er af Hesteyri við Hesteyrarfjörð. Eins og myndin blasir við þá er Árrifið efst til hægri en Hesteyrará rennur niður að því og beygir síðan að mestu inn

 

með ströndinni ofan við rifið. Á þessum tíma er búið að stífla kvíslina sem rann beint til sjávar. Sjá má móta fyrir veginum áleiðis inn að hval/síldarstöðinni á Stekkeyri vinstra megin við ána hjá Árrifinu, en ofar með ánni (lengra til vinstri) liggur vegur í átt að Látrum í Aðalvík. Neðan árinnar á myndinni er óregluleg röð fjögurra húsa, sem talin frá vinstri (ofan frá) eru: Foss eða Fossar, áður oft kallað Hansínuhús, þá húsið „í Mógnum“, á síðari árum gjarnan kallað Móar eða Mór eða Móhús til samræmis við stífa ásókn í að öll örnefni skuli vera í nefnifalli. Læknishúsið er þriðja húsið og niðri á sjávarbakka er verslunarhús Guðmundar H. Albertssonar. Nánast á miðri mynd eru Heimabæir tveir fast saman og neðan við þá lítið eitt til vinstri er Reyrhóll. Því sem næst beint í átt til sjávar frá Reyrhóli er gamalt sjóarhús Reyrhólsbænda og skammt frá því (neðar á myndinni) er hjallur, sem á þessum tíma var búið að breyta í sumarhús. Enn neðar á myndinni, niðri við strönd, er skólahúsið neðst í Veitunni og eilitlu neðar nærri miðju er svo húsið sem enn stendur á Langavelli“.

 

 

 

 MARS 2012

Nafn Hólmgeirs Hólmgeirssonar var dregið úr réttum svörum.

 

Myndir er úr Dýrafirði. Fyrir miðri mynd er Mýrafell, þar til hægri bærinn Mýrar. Utanvert við Mýrafell er Núpur og þar fyrir utan bærinn Alviðra.

 

 

 

 

 

 

 

FEBRÚAR 2012:

Myndin sýnir Loðmundarfjörð.

Nafn Magnúsar Fjalars Guðmundssonar var dregið úr réttum svörum

Á myndinni sést fjallið Gunnhildur og Hjálmárdalur austan við. Sævarendi, Stakkahlíð og Klyppsstaður sjást einnig greinilega.

 

 

 

 

NÓVEMBER 2011-JANÚAR 2012: 

Þessi mynd sýnir Reykjavíkurapótek.

Nafn Arnar Úlfars Sævarssonar var dregið úr réttum svörum.

 

 

 

 

 

 

 

SEPTEMBER-OKTÓBER 2011:

Þessi bútur er úr korti semunnið er upp úr IS 50V gagnagrunni Landmælinga Íslands og er hægt að skoða hér.

Metfjöldi tók þátt og rigndi yfir réttum svörum.

Nafn Jóhönnu Guðmundsdóttur var dregið úr réttum svörum.

Kortið sýnir að sjálfsögðu m.a. Haukadal, Haukadalsvatn og Sauðafell í Dölum.

 

 

 

 

 

JÚLÍ-ÁGÚST 2011:

Loftmyndin sýndi vatnasvæði Lýsu og kom ekki eitt rangt svar í þetta skiptið svo það er greinilegt að fólk þekkir landið sitt vel.

Við drógum nafn Bessa Aðalsteinssonar úr réttum lausnum.

Nokkur rétt svör sem taka fram hin ýmsu atriði sem sjá má á myndinni:

• Þetta er Bláfeldarhraun á Snæfellsnesi t.v. og nokkur lón meðfram ströndinni. Vatnsholtsvötn lengst t.v., ofar er Lýsuhóll en sést ekki vel.
• Þetta er á sunnanverðu Snæfellsnesi. M.a. Hóp, Lýsuvatn, Torfavatn og bærinn Lýsuhóll
• Myndin er af Staðarsveit á sunnanverðu Snæfellsnesi. Á myndinni sést meðal annars Lýsuhyrna og Lýsuvatn.
• Þessi loftmynd er af Lýsuhól á sunnanverðu Snæfellsnesi.
• Efst til hægri er Bláfeldarhraun, svo Ána- og Lýsuhyrna og á milli þeirra er Hrútsgil. Lýsuhóll er fyrir miðri mynd.

MAÍ-JÚLÍ 2011:

Danska myndin sýnir fossinn Dynjanda.

Nafn Þóru Þorsteinsdóttur var dregið úr miklum fjölda réttra svara.

 

 

 

 

 

 

 

MARS-APRÍL 2011:

Bæjarteikningin var af Eyrarbakka. Líklega er ekki skrítið að margir hafi nefnt Stokkseyri þar sem bæjirnir eru í daglegu tali hjá mörgum nefndir einu nafni Stokkseyrarbakki.

Nafn Gústafs Jónssonar var dregið úr réttum svörum.

Það var eitthvað um skemmtilegt ítarefni sem fylgdi með:

• Þessi uppdráttur sýnir Eyrarbakka ásamt Gamla-Hrauni og hraunin/skerjagarðinn framundan ströndinni.
• Þetta held ég að sé Eyrarbakki. Fyrrum tilvonandi höfuðstaður Íslands.
• Eyrarbakki. Á kortinu sést meira að segja járnbrautin sem dönsku kaupmennirnir lögðu.

JANÚAR-FEBRÚAR 2011:

Þessi mynd sýnir Patreksfjörð (Vatneyri) og voru ansi margir sem svöruðu rétt.

Baldur Borgþór Waage var dreginn út og fær stafræna loftmynd frá Landmælingum Íslands.

• Þetta er Geirseyri (framar) og Vatneyri við Patreksfjörð þar sem samnefnd byggð stendur nú.
• Gæti séð þessa mynd fyrir mér sem Patreksfjörð. Getur verið að við sjáum sjóræningjahúsið á þessari mynd?
• Myndin er frá Patreksfirði. Eyrin nær er Geirseyri en Vatneyri fjær.
• Þessi mynd er frá Patreksfirði. Hún er tekin frá Geirseyri og sér yfir til Vatneyrar og Blakkurinn í fjarska.
• Ég tel að myndin í myndagetrauninni sé af Patreksfirði við samnefndan fjörð. Eyrin sem bærinn stendur á er nokkuð auðþekkjanleg með lóni sem í dag er hafnaraðstaða og á gömlu myndinni er byggðin dreifð allt frá eyri og inn eftir ströndinni líkt og í dag.
• Myndin er tekin í Patreksfirði. Bryggjan neðst á myndinni er á lítilli eyri sem heitir Geirseyri og er byggðin aðallega upp af henni en teygir sig út hlíðina og út á eyrina sem er fjær á myndinni og heitir Vatneyri, eftir litlu vatni sem þar var, en eftir seinna stríð var hafist handa við að grafa höfn inn í vatnið. Byggðin hét áður Eyrar.
• Ég sé ekki betur en að myndin sé af Geirseyri (nær) og Vatneyri (fjær) en í dag heitir byggðin Patreksfjörður eftir firðinum. Áður var byggðin einnig um tíma kölluð Eyrar.
• Myndin er tekin í norðvestur, líklega af Geirseyrarmúla eða Mikladal. Ofan við byggðina er fjallið Brellur. Við húsið niðri í hægra horninu á myndinni rennur Mikladalsá. Næst fyrir miðri mynd neðst er pakkhús og „hafskipabrú“ (en þetta má sjá á bæjarteikningu frá 1913, en mér finnst að þá sé byggðin orðin eitthvað stærri en á ljósmyndinni). Fjærst er Vatneyri en þar var áður vatn sem sést á myndinni en það var grafið út árið 1947 og þar gerð Patrekshöfn. Handan fjarðarins sér í Hænuvíkurhlíð og út á Blakknes.
• Aldur byggðar á staðnum þekki ég ekki en á Geirseyri mun hafa verið bænhús í kaþólskri tíð. Geirseyrar er getið í skiptabréfi eftir Björn Þorleifsson frá 1467. Elstu heimildir um verslun á Vatneyri eru frá 1570. Danir höfðu einokunarverslun þar frá því um 1604 til 1787, en þar hafa einnig aðrar Evrópuþjóðir stundað verslun og fiskveiðar í gegnum aldirnar, m.a. Þjóðverjar, Englendingar og Frakkar. Veturinn 1615-16 dvöldu á Vatneyri þeir basknesku hvalfangarar sem brutu skip sín á Ströndum og komust undan Ara sýslumanni í Ögri. Eftir að einokunarverslunin var lögð niður var áfram stunduð verslun á Vatneyri og komu margir þar að. Verslun hófst á Geirseyri um miðja 19. öld varð löggiltur verslunarstaður árið 1877. Á síðari hluta 19. aldar hófst þorpsmyndun á staðnum. Árið 1904 hófst bygging kirkjunnar á Geirseyri en hún var vígð árið 1907. Ég er ekki alveg viss, en sýnist samt að á myndinni sé búið að reisa kirkjuna. Hún var með lægri turni í byrjun en á 4. áratug 20. aldar var timburturninn rifinn og steyptur hærri turn.
• Myndin er tekin við Patreksfjörð. Kom út á bréfspjaldi og þá lituð.
• Myndin er frá Vatneyri við Patreksfjörð. Um er að ræða um 100 ára gamla mynd, jafnvel eldri. Sjálfur kannast ég við þessa mynd frá því ég veitti bókasafni Iðnskólans í Reykjavík forstöðu. Við tiltekt í skólanum fyrir um 12-13 árum kom þessi mynd í leitirnar og tilheyrði eftirlátnum munum Helga Hermanns Eiríkssonar sem var skólastjóri Iðnskólans fyrri hluta aldarinnar sem leið, nálægt 25-30 ár. Ævisögu hans ritaði Guðmundur G. Hagalín en Helgi átti uppruna sinn að rekja til Patreksfjarðar.

DESEMBER 2010:

Þessi getraun var erfið enda er þetta svæði mikið breytt en þetta eru Vestmannaeyjar. Þegar smellt er á þessa mynd er hægt að sjá hvernig myndin lítur út óklippt.

Emil Bóasson fær að velja sér stafræna loftmynd frá Landmælingum Íslands.

• Staðhættir minna mjög á Vestmannaeyjar nokkuð fyrir gos.
• Fá byggðarlög á Íslandi eru með vík til vesturs og opið haf til austurs.
• Eftir þónokkra yfirlegu er ég svo til viss um að svarið við getraun desembermánaðar sé Vestmannaeyjabær en miðað við nútímakort er augljóst að höfnin hefur breyst mjög mikið á þessum 107 árum. Þar sem ég hef einungis einu sinni komið þangað, og það fyrir 11 árum, ætla ég ekki að fjölyrða meira um það.
• Þessi var erfið. Enginn staður á „landinu“ passaði almennilega en það dugði að fara til Vestmannaeyja. Á bls. 69 í árbók FÍ 2009 um Vestmannaeyjar er mynd sem dugði sem sönnunargagn.
• Þetta eru Vestmannaeyjar. Gjörsamlega ólíkt öllu því sem er í dag.

NÓVEMBER 2010:

Bæjarteikningin vafðist fyrir mörgum og var fólk að giska á 7 mismunandi staði… mjög óvenjulegt.

Flestir vissu þó rétta svarið sem er Ólafsvík.

Nafn Heiðars Skúlasonar var dregið úr réttum svörum.

OKTÓBER 2010:

Þetta var ljósmynd tekin af dönsku mælingamönnunum mjög snemma á síðustu öld.

Myndin sýnir Miðbæjarskólann í Reykjavík.

Nafn Jóhanns Thorarensen var dregið úr réttum svörum.

Valinn fróðleikur sem fylgdi með nokkrum svaranna:

• Sæl getraun. Þetta er tekið í portinu við Miðbæjarskólann í Reykjavík. Þetta er líklega spegilmynd þar sem í fjarskanum sést í húsin ofan við Laufásveginn þannig að ef landmælingamennirnir eru í portinu þá ættu þeir að standa upp við íþróttasalinn en þar eru stórir gluggar á neðri hæðinni en litlir á eftir hæðinni. ? Jú þetta er spegilmynd.
• Þetta er mynd af Miðbæjarbarnaskólanum en hann var byggður og tekinn í notkun 1898. Myndin er tekin sunnan við skólann.
• Þetta er mynd af gamla Miðbæjarskólanum í Reykjavík sem einnig var notaður sem sjúkrahús þegar Spánska veikin herjaði í Reykjavík.

 

SEPTEMBER 2010:

Myndin var tekin árið 1945 af kortadeild bandaríska hersins og sýnir Jökulsárlón þar sem það er að byrja að myndast. Kíkið á hvernig lónið lítur út rúmum 60 árum síðar: http://atlas.lmi.is/kortasja/ (súmma vel inn)

Nafn Sigurðar Gústafssonar var dregið úr réttum svörum.

Að venju eru hér fræðandi og skemmtilegar upplýsingar sem fylgdu með svörum:

• Fyrir 1950 rann Jökulsá á Breiðamerkursandi beint undan jökli u.þ.b. 1,5 km til sjávar. Síðan hefur jökulllinn hörfað og sístækkandi lón myndast. Meðalrennsli árinnar er 250-300m3/sek og stórir ísjakar brotna af jökuljaðrinum sem er á floti í vatni. Lónið er feikidjúpt, a.m.k. 160m. Áin styttist stöðugt vegna brimrofs og árið 1998 var hún varla meira en 500m. Yfirborð lónsins hefur lækkað stöðugt þannig að nú gætir sjávarfalla í því. Það þýðir einfaldlega að hlýrra vatn streymir inn í það á flóði og ísinn bráðnar mun hraðar en fyrrum. Árið 2003 hófust framkvæmdir til að fyrirbyggja frekara landbrot, m.a. með því að hækka vatnsstöðu lónsins svo að sjór falli sem minnst eða ekki inn í það.
• Myndin er tekin í flugvél sem er flogið yfir Breiðamerkursand. Á myndinni má sjá Breiðamerkurjökul eins og hann var árið 1945 en síðan hefur hann minnkað mikið. Einnig má sjá það sem mig minnir að sé styst jökulá landsins, Jökulsá á Breiðamerkkursandi. Jökulsárlón er nú þar sem jökullinn er á myndinni. Auk þessa er austast á myndinni áin sem einu sinni var en hún hét Stemma.
• Á myndinni er Breiðamerkurjökull og Jökulsárlón á Breiðamerkursandi sem myndaðist um miðja 20. öldina. Til hægri á myndinni má einnig sjá hvernig Veðurá rann áður.
• Þetta er Breiðamerkurjökull og Jökulsárlónið á Breiðamerkursandi.
• Nyrðri áin er þá væntanleg Stemma, sem hvarf fyrir nokkrum árum , þegar fór að renna meðfram jökli í Jökulsárlónið.
• Myndin er pottþétt tekin í geimnum… En á myndinni sést vissulega Jökulsárlón og sést því greinilega (ef borið er saman við núverandi myndir í kortasjá frá Landmælingum Íslands) hversu mikið jökullinn hefur hopað. Magnað fyrirbæri alveg hreint
• Myndin er tekin af Jökulsárlóni og Breiðarmerkurjökli með Esjufjallaröndina ansi greinilega. 

 

ÁGÚST 2010:

Myndin var tekin árið 1907 af dönskum mælingamönnum og sýnir Hraungerðiskirkju í Flóa.

Nafn Björns Kristleifssonar var dregið úr réttum svörum.

• Kirkjan er Hraungerðiskirkja í Flóa. Dönskku landmælingamennirnir voru þarna lengi við störf vegna Flóaáveitunnar. Ákvörðun tekin 1907, byrjað 1917, verklok 1927.
• Þetta er Hraungerðiskirkja í Hraungerðissókn. Kirkjusmiður var Eiríkur Gíslason frá Bitru og var kirkjan vígð 21. desember 1902. Árið 1990 var Hraungerðiskirkja friðuð skv. þágildandi þjóðminjalögum nr. 88/1989.
• Mér sýnist þetta vera Hraungerðiskirkja í Flóa. Hún er ekkert óskaplega frábrugðin Kotstrandarkirkju í Ölfusi sem hefur þó uppmjórri turnspíru og sinn gluggann hvorum megin útidyra.
• Kirkjan er Hraungerðiskirkja skammt frá Selfossi. Ekinn er afleggjarinn að Oddgeirshólum. Með fallegri kirkjum á landinu.
• Myndin er af Hraungerðiskirkju sem reist var 1902. Kirkjusmiður var Eiríkur Gíslason frá Bitru. Kirkjan var í samnefndum hreppi, Hraungerðishreppi. Hann var í norðanverðum Flóanum í Árnessýslu. Þann 10. júní 2006 sameinaðist Hraungerðishreppur Villingaholtshreppi og Gaulverjabæjarhreppi sem mynda saman Flóahrepp.

Þess má geta að nú eru allar dönsku myndirnar aðgengilegar á heimasíðunni: http://picasaweb.google.com/100975844608523433248/MyndirDanskraLandmLingamanna?feat=directlink#

JÚLÍ 2010:

Mynd í júlígetraun sýndi Núpsstað í Fljótshverfi. Myndin var tekin árið 1904.

Nafn Ólafs Ragnars Helgasonar var dregið úr réttum svörum.

• Myndin er tekin af Núpsstað, austasta bænum í Fljótshverfi í Vestur-Skaftafellssýslu. Þar bjuggu landspóstar sem fóru með póst yfir jökulárnar miklu sunnan Vatnajökuls til Hornafjarðar, allt austur til Eskifjarðar. Nafntogaðastur þeirra er Hannes Jónsson, eða Hannes á Núpsstað eins og hann var nefndur í daglegu tali. Bóndi á Núpsstað þegar myndin var tekin 1904 var annaðhvort Hannes eða faðir hans Jón Jónsson sem einnig var póstur. Eftir sameiningu sveitarfélaga og afnáms sýslna sem stjórnunarlegra eininga er Núpsstaður nú austasti bær í Skaftárhreppi.
• Ég held að myndin sé af Núpstað í Fljótshverfi. Þar er frægt lítið bænhús.
• Ég vænti þess að svarið sé Núpsstaður í Fljótshverfi, austasti bær í Vestur-Skaftafellssýslu, vestan Lómagnúps. Fyrir ofan Núpsstað eru áhugaverðir móbergsklettar með basalt innskotum. Þeir munu heita Eystrikinnar. Til hægri á myndinni sér á Fjarðarárdalshnjúk.
• Bærinn sem um getur er bærinn Núpsstaður. Húsið er torfhlaðið og mun það vera frá 17. öld, líklega byggt ekki síðar en 1657. Þar hafa margir merkir menn komið við sögu. Brynjólfur biskup Sveinsson vísiteraði Núpsstaðakirkju og Jón eldklerkur Steingrímsson messaði þar 1783. Bænhúsið á Núpsstað var endurbyggt á árunum 1958-1961 en það er nú í vörslu Þjóðminjasafnsins.

MAÍ-JÚNÍ 2010:

Það viðurkennist að þessi mynd var í þyngri kantinum en þó voru nokkrir sem sendu inn réttar lausnir.

Myndin er tekin árið 1991 yfir þekktum ferðamannastað.

Nafn Óskars Einarssonar var dregið úr réttum svörum.

• Myndin er af Jökulsá á Fjöllum og má þ.m.a. sjá neðarlega á myndinni Selfoss, síðan Dettifoss og síðan Hafragilsfoss ofarlega.
• Þetta er skemmtileg mynd og þessir ljósu flekkir rugluðu mig. Fyrst hélt ég þetta vera gufumekki á jarðhitasvæði, þar næst mökk úr fokbörðum að blása upp en svo reyndust þetta vera fossarnir Hafragilsfoss, Dettifoss og Selfoss í Jökulsá á Fjöllum. Vegurinn þarna austan við er svo vondur að hann sést eiginlega bara á smákafla.
• Þetta ku vera mynd af Jökulsá á Fjöllum. Liggur áin á mörkum Suður Þingeyjarsýslu, Norður Múlasýslu og Norður Þingeyjarsýslu. Á myndinni má sjá a.m.k. 3 fossa og ber þar fremstan að nefna miðjufossinn, Dettifoss.

APRÍL 2010:

Danskir mælingamenn tóku mikið af ljósmyndum á ferðum sínum um Ísland á árunum 1900-1910.

Myndin sýnir mælingaflokk kafteins Hammershöy á leið til mælinga. Myndin er tekin í miðbæ Reykjavíkur í byrjun síðustu aldar.

Nafn Konráðs Einarssonar var dregið úr réttum lausnum.

Hér koma nokkur fróðleg svör:

• Myndin er tekin þar sem nú er Lækjartorg í Reykjavík. Húsin voru við Hafnarstræti. Húsið hægra megin með stóra kvistinum er Zimsenhúsið. Skjólgirðingin framan við Thomsenshúsið er ótrúlega nútímaleg, einingarnar í hana hefðu geta verið keyptar í Byko rétt fyrir bankahrunið.
• Að sjálfsögðu er þetta tekið á Lækjartorgi í Reykjavík. Væntanlega er þetta einhvern tímann í kringum 1905. Á hægri hönd má sjá það hús sem lengi var kallað Smjörhúsið, en það er Hafnarstræti 22. Thomsen keypti það væntanleg upp úr 1902 og setti þar upp hluta af sinni verslun, en það verslunin Smjörhúsið opnaði þar 1910. Áður var það kallað Sívertsen hús, en þarna var m.a. Prestaskólinn til húsa á sínum tíma. Húsið sem sést til hægri var nefnt Siemsen hús, en það var Hafnarstræti 23. Þarna var undir lokin fyrirtækið Dráttarvélar, en húsið var rifið 1973 – Hafnarstræti 22 var hins vegar rifið 1977. Ekki er gott að vita hvaða trússlest er þarna á ferð, en kannski eru þetta landpóstar að leggja upp? Dannebrog er í hálfa stöng – en af hvaða tilefni er ekki gott að segja.
• Miðað við nákvæmni er nú kannski ekki hægt að fullyrða hvort ég á að segja núverandi Lækjartorg eða Lækjargata en mér sýnist hún tekin sirka úr Austurstræti gegnt horni Austurstrætis Lækjargötu og Bankastrætis.
•  Thomsens-magasin var víst í Hafnarstræti 17-22 í Reykjavík. Húsið var rifið 1961 en þá hafði verið rekið hótel í því frá 1920 hótelið hét Hótel Hekla.
• Í Lækjargötu á móts við Lækjartorg, húsið í baksýn hýsti seinna Dráttarvélar h.f. og Samvinnusparisjóðinn.
• Thomsens magasin var staðsett þar sem hús stendur við Lækjartorg og er þar til húsa Þórarinn tannlæknir og gleraugnabúð á jarðhæð. Þetta var í Hafnarstræti 20, sem var rifið og þetta steinhús byggt á reitnum. Thomsens magasin var vandaðasta verzlun Reykvíkinga.
• Thomsens-magasin var víst í Hafnarstræti 17-22 í Reykjavík. Húsið var rifið 1961 en þá hafði verið rekið hótel í því frá 1920 hótelið hét Hótel Hekla.

FEBRÚAR-MARS 2010:

Myndin var tekin árið 1960 og sýnir Eystri-Rangá og nágrenni.

Nafn Stefáns Steinssonar var dregið úr réttum lausnum.

Fróðleikur frá nokkrum svarenda:

• Eystri Rangá fellur nettó frá ANA til VSV. Norðan við hana á myndinni gefur að líta bæði Hof Marðar Valgarðssonar og Hof annað Skammkels. Neðst á myndinni glittir í Hvolsfjall. Milli þess og stórbýlisins Akurs liggur þornaður árfarvegur, er nefnist Aldan. Hún teygir sig suður í gegnum Hvolsvöll, og er eina landslagið innan kauptúns í þeim stað.
• Áin sem bugðast svona fallega er Eystri-Rangá, skammt ofan hringvegarins. Bæirnir ofan við ána, eða öllu heldur vinstra megin við hana á myndinni munu vera Stórahof og Minnahof. Bæirnir hægra megin gætu m.a. verið Völlur, Lynghagi og Hjarðartún.
• Myndin er af E-Rangá frá mótum Rangár og Fiskár í NA horni myndar að Dýjanesi til SV. Við SA horn myndarinnar sést meirihl. Hvolsfjalls og ef myndin næði aðeins sunnar sæi í æskustöðvar mínar sem er Þinghóll í Hvolhreppi (hinum forna).
• Á myndinni má sjá Eystri-Rangá í Rangárvallasýslu þar sem hún hlykkjast um Rangárvelli. Neðst á myndinni hægra megin má greina Hvolsfjall en sunnan undir því er kauptúnið Hvolsvöllur sem sést ekki á myndinni. Austan við Hvolsfjall (hægra megin) sést bærinn Efrihvoll neðst á myndinni, og má greina veginn (nr. 262) þaðan og upp að næstu bæjum sem eru Kotvöllur, Völlur og Bakkavöllur. Efst í hægra horni sést hvar Fiská kemur inn á myndina og tekur vinkilbeygju og rennur í Eystri-Rangá. Vestan við Hvolsfjall (vinstra megin) má líklega greina bæina Akur, Miðtún, Lynghaga og Hjarðartún. Vestan árinnar sést Rangárvallavegur (nr. 264) koma inn á myndina frá vinstri nálægt miðri mynd og skömmu síðar er afleggjari að bænum Stóra-Hofi, en þar bjó um tíma Einar Benediktsson, og var þá sýslumaður þeirra Rangæinga. Nokkru fyrr bjó á Stóra-Hofi Mörður Valgarðsson. Skammt ofan við Stóra-Hof er svo bærinn Minna-Hof, og svo hverfur vegur 264 upp af myndinni í átt að Keldum á Rangárvöllum sem er nokkrum kílómetrum ofar. Rangárnar, Eystri og Ytri hafa um árabil verið fengsælustu laxveiðiár landsins.
• Myndin er af Eystri-Rangá frá ármótunum við Fiská að ofan. Læt hér fylgja með skjal með getraunarmyndinni og skjámynd sem ég klippti af loftmyndavefnum ykkar. Athyglisvert að sjá muninn.

DESEMBER 2009 – JANÚAR 2010:

Myndin var tekin árið 1914 og sýndi Hóla í Hjaltadal.

Við drógum nafn Ómars Ingþórssonar úr fjölmörgum réttum lausnum.

Fróðleikur:

• Þessi mynd er tekin á Hólum í Hjaltadal. Í dag eru komin fleiri hús en Skólahúsið og Kirkjan eru enn á sínum stað. Núna er komið mun meira af byggingum og væri sennilega ekki hægt að taka mynd frá þessu sjónarhorni vegna hæðar skógarins.
• Hólar í Hjaltadal. Sérlega áhugaverð vormynd sem sýnir garðlönd í svonefndri Gróðrarstöð norðan við Virkishólinn og fjósin í brekkunni austan við hólinn. Líka kofann í forgrunni sem verið hefur ofan við húsmannsbýlið Traðarhól þar sem er núverandi aðsetur vígslubiskupsins á Hólum.
• Myndin er frá Hólum í Hjaltadal í Skagafirði. Það er Hóladómkirkja sem er hægra megin á myndinni, en bygging hennar hófst 1757 og hún var vígð árið 1763. Hún er byggð úr tilhoggnum steini [rauðum sandsteini] úr fjallinu Hólabyrðu, en Hólar standa undir hlíðum þess. Árið 1950 var byggður turn framan við kirkjuna til minningar um Jón Arason biskup, en hann var síðasti kaþólski biskupinn á Íslandi, og var hálshöggvinn árið 1550. Önnur hús á myndinni tilheyra Búnaðarskólanum á Hólum, sem var stofnaður árið 1882, en Skagafjarðarsýsla hafði keypt jörðina árið áður.
• Hér að neðan er til gamans mynd sem er á vef Hólaskóla, en á henni eru nokkurn veginn sömu húsin og á getraunamyndinni: http://www2.holar.is/index.php?option=com_content&view=article&id=89&Itemid=96

NÓVEMBER 2009:

Myndin sem er úr Lónafirði inn af Þistilfirði var tekin árið 1980 og var nafn Helgu Ragnarsdóttur dregið úr réttum lausnum.

Punktar úr réttum svörum:

• Þetta er Lónafjörður inn af Þistilfirði. Vegakerfið gefur bestu upplýsingarnar auk þess sem hægt hefur verið að treysta á að myndin snúi rétt. Meðal bæja sem sjást eru Gunnarsstaðir heimaslóðir fjármálaráðherrans okkar.
• Þarna er Leira í Lónafirði, inn af Þórshöfn. Ströndin við sjóinn nefnist Gunnarsstaðasandur, en Gunnarsstaðir sjást ágætlega við skurðina sem vísa frá SA til NV. Með þökk fyrir prýðilegan vef.
• Myndin er af botni Lónafjarðar, sem er inn að Þistilfirði. Þórshöfn er rétt norðaustan við myndrammann en það bætir það upp að stórbýlið Gunnarsstaðir er vinstra megin á myndinni, en þar er auðvitað fæddur fjármálaráðherra vor, Steingrímur Jóhann Sigfússon.
• Lónafjörður, Gunnarsstaðasandur, Leira, Flói, Steingrímur.
• Myndin er frá botni Þistilfjarðar, eða Lónafjarðar eins og innsti hluti hans heitir. Þarna er ós Hafralónsár. Áberandi sveitabæir eru Gunnarsstaðir vinstra megin og Syðribrekkur hægra megin. Brúarland er skammt frá brúnni og Hallgilsstaðir eru í jaðri myndarinnar niðri fyrir miðju. Síðan myndin er tekin er komin ný brú og vegur spölkorni utar en þarna er.
• Myndin er úr botni Lónafjarðar sem er innfjörður úr Þistilfirði. Það er Hafralónsá sem rennur þarna til sjávar og breiðir úr sér á Leiru áður en hún fellur til sjávar í Lónafjörð um ós sem sker í sundur Gunnarsstaðasand. Þjóðvegur nr. 85, Norðausturvegur kemur inn á myndina ofarlega vinstra megin og liggur yfir Hafralónsá með nokkuð krappri beygju við brúna og myndin er það gömul að núverandi vegur er ekki kominn, en hann liggur í mjúkum sveig þarna yfir. Vegurinn hverfur svo út af myndinni út með austanverðum Lónafirði efst í hægra horninu og stefnir þá á Þórshöfn sem stendur við utanverðan Lónafjörð, en það eru ca. 8 km frá Hafralónsá út á Þórshöfn. Bærinn Gunnarsstaðir er ofarlega vinstra megin á myndinn, en þaðan er okkar ágæti fjármálaráðherra. Rétt vestan við Hafralónsá er bærinn Brúarland og þar er líka afleggjarinn að Hvammi og hverfur vegurinn út af myndinni rétt áður en komið er að þeim bæ. Strax austan við Hafralónsá er svo afleggjari að bænum Hallgilsstöðum og sést bærinn alveg neðst á myndinni fyrir miðju. Bærinn Syðribrekkur er svo austan vegarins þar sem hann liggur út með Leirunni að austanverðu. Nokkrar ár falla í Þistilfjörð, m.a. Svalbarðsá, Sandá, Hölkná og Laxá, en Hafralónsá er austust og þeirra mest og er ágæt veiðiá. Hún kemur úr Hafralóni sem er stöðuvatn innarlega á Tunguselsheiði, u.þ.b. 35 km frá sjó.
• Getraunamynd nóvembermánaðar 2009 er norðan úr Þistilfirði. Þarna eru ósar Hafralónsár þar sem hún rennur til sjávar um Gunnarsstaðasand. Austan við sandinn, frammi á sjávarkambinum, stendur eyðibýlið Sætún en næsti bær þar sunnan við eru Syðri Brekkur. Vestan við Gunnarsstaðasandinn standa svo Gunnarsstaðir þaðan sem jarðfræðingurinn Steingrímur Jóhann Sigfússon er upprunninn. Syðst á miðri mynd sjást svo Hallgilsstaðir. Á myndinni sést greinilega hvar vegurinn lá yfir Hafralónsá við bæinn Brúarland en nú hefur brúin verið færð utar á ána og vegurinn liggur í mýkri sveig þar yfir. Það er skemmtilegt að benda á það að nafn Hallgilsstaða er í munni heimamanna í Þistilfirði borið fram með opnu tvöföldu elli, svipað og í mannsnafninu Halldór. Til samanburðar má nefna að sama bæjarnafn er í Eyjafirði borið fram með lokuðu ell-hljóði svipað og í orðinu fjall.

 

 OKTÓBER 2009: 

Þessi var frekar snúin enda bárust tiltölulega fá svör -en flest þeirra rétt!

Myndin var tekin árið 1955 og sýnir Álftaver við Kúðafljót.

Nafn Ársæls Jóhannssonar var dregið úr réttum lausnum.

Þetta hafði fólk að segja:

• Þessi mynd er af Hryggjamýri og Álftaveri austan við Mýrdalssand.
• Ég held að þessi mynd sé af Álftaveri í Vestur-Skaftafellssýslu. Á neðri hluta myndar rennur Landbrotsá í gegnum sveitina en efst til vinstri sér í Kúðafljót.
• Það var mikill fundur austur á Reyðarfirði hjá bróður mínum um helgina yfir síðustu mynd. Hún þvældist mikið fyrir honum enda kom í ljós að þegar hann hafði stækkað hana í tölvunni sinni hafði hann snúið henni við. En þegar það hafði verið leiðrétt var gátan líka leyst. Árnar eru Kúðafljót og Skálm og þarna sést Álftaver með Skálmarbæjunum og fleiri bæjum.
• Þessi mynd sýnir ármót Kúðafljóts og Landbrotsár í Álftaveri.
• Loftmyndin sýnir svæðið sem heitir Álftaver, sem er við suðurströnd landsins og liggur niður af Mýrdalssandi austanverðum. Þarna má finna staði eins og Þykkvabæjarklaustur (sunnan við Mjóásvatn) og prestsetrið Mýrar sem er suðaustan við Mjóásvatn. En fyrir miðri mynd má sjá Mjóásvatn. Kúðafljót rennur austan megin með Hryggjamýri á milli. Sunnan við vatnið rennur Landbrotsá. Vestan megin við vatnið má sjá tvö vötn sem tengjast, það efra heitir Holtsvatn og það neðra Herjólfsstaðavatn. 

SEPTEMBER 2009:

Myndin var tekin árið 1996 og sýnir m.a. Skarðsfjall í Landssveit.

Við drógum nafn Helgu S Ragnarsdóttur úr réttum svörum. 

Ítarefni með svörum:

• Myndin er tekin í Landssveit, og sést yfir í Gnúpverjahrepp. Neðst til hægri á myndinni er stórbýlið Skarð á Landi, og sést hvernig þjóðvegur nr. 26, Landvegur, liggur í sveig framhjá bænum, og líklega má greina hús á bænum Stóra-Klofa vestan vegar um það leyti sem vegurinn hverfur út af myndinni. Fjallið ofan til á miðri myndinni heitir Skarðsfjall (336 m hátt), neðar heitir Miðfell og raninn neðst heitir Fellsmúli. Bæirnir vestan við fjallið eru Hellar (neðar á mynd) og Hvammur. Á eftri hluta myndarinnar rennur Þjórsá hjá, en eyjan í ánni heitir Minnanúpshólmi. Handan árinnar sést Þjórsárdalsvegur (nr. 32) þar sem hann liggur framhjá bænum Minna-Núpi sem sést á myndinni, og einnig sést afleggjarinn sem liggur að kirkjustað þeirra Gnúpverja á Stóra-Núpi, og hverfur sá vegur út af myndinni efst í vinstra horninu.
• Ég held að þessi mynd sé af Miðfelli í Holta- og landssveit. bærinn á miðri mynd er Hvammur og neðst á myndinni sést Skarð í Landssveit. Efst á myndinni sést Þjórsá og Minnanúpshólmi.
• Þetta mun vera Skarðsfjall í Landssveit og rennur Þjórsá efst (nyrst). Hólminn í ánni er Minnanúpshólmi skógi vaxinn eins dökki liturinn ber með sér.
• Þetta er Skarðsfjall í Landsveit. Bærinn vestan megin við fjallið er Hvammur og neðar eru Hellar og þar er að finna manngerða hella sem bærinn dregur nafn sitt af. Skarð er austan megin við fjallið. Áberandi hólmi í Þjórsá er Minnanúpshólmi (Viðey) og vegurinn áleiðis í Þjórsárdal liggur upp með ánni norðanverðri. Ef Núpsvirkjun verður að veruleika verður Þjórsá líklega stífluð efst fyrir miðri mynd.
• Það sem við sjáum er Minninúpshólmi sem mundi koma til með að verða rétt neðan við Hagalón, einig sjáum við Núpsfjall og Skarðsfjall einnig má sjá bæina Minninúpur, Kvammur, Hellnar, Fellsmúla og Skarð.
• Þetta er Skarðsfjall í Landsveit í Rangárvallasýslu. Fjallið er 336 m.y.s.
• Hólminn heitir Minnanúpshólmur.
• Myndin sýnir Skarðsfjall í Landsveit. Efst sér í Þjórsá og í henni Minnanúpshólmi. Við SV enda Skarðsfjalls er bærinn Hellar. Þar mun vera stærsti manngerði hellir á Íslandi ( ef virkjunum er sleppt).

ÁGÚST 2009:

Þessi getraun var létt enda bárust tugir réttra svara.

Myndin var tekin árið 1994 og sýnir botn Mjóafjarðar fyrir austan.

Nafn Filippusar Sigurðssonar var dregið úr réttum svörum.

Skemmtilegar upplýsingar sem fylgdu með:

• Mynd ágústmánaðar er af Mjóafirði. Fjarðaráin rennur í austurátt um afar stöllótt landslag að botni fjarðarins, en hefur þó náð að grafa sig eitthvað niður í bergið. Þjóðvegurinn liggur sömu leið, þó öllu krókóttari. Enn er talsverður snjór í fjöllunum norðan og sunnan við fjörðinn og hrikalegar hvilftir efst í fjöllunum því áberandi á myndinni. Skolleyraráin hefur með framburði sínum myndað ljósa eyri við fjörðinn sunnanverðan. Þetta er ugglaust hættulegt snjóflóðasvæði en afar fallegt. Bæi er erfitt að greina á myndinni en þeir heita: Fjörður, Skógar, Fjarðarkot og Friðheimar þó einhverjir séu nú komnir í eyði.  Eitt af fallegari svæðunum á austurlandi  
• Þetta mun vera í botni Mjóafjarðar í Fjarðabyggð. Yndislegur staður að koma á…í góðu veðri. 
• Það fyrsta sem manni dettur í hug er Mjóafjarðarbotn, og mun svo vera. Austfirðingar þekkja Fjarðardal, Skolleyri, Fjörð, trúlega þá þegar í eyði. 
• Myndin sýnir botn Mjóafjarðar. Ef vel er nýnt má sjá í kollinn á Vilhjálmi Hjálmarssyni – sitjandi á steini norðanvert við fjörðinn. 
• Þetta er botn Mjóafjarðar. Vegurinn sést hlykkjast niður Mjóðafjarðarheiðina niður í dalinn og síðan norðanmegin fjarðarins (þótt það sé ekki eins greinilegt á myndinni) út í Brekkuþorp og þaðan áfram út á Dalatanga.
• Þessi mynd er tekin af botni Mjóafjarðar eystra. Bæjarhúsin í Firði eru áberandi, sem og vegurinn upp á Mjóafjarðarheiði. Enn fremur er Skolleyrin áberandi kennileiti.
• Það sést í botninn (innsta hlutann) á Mjóafirði þar þar sem Fjarðaráin, með sína fallegu fossaröð, rennur til sjávar.
• This is the bottom of Mjóifjörður, east Iceland; a quiet and beautiful place… with many blueberries along the road in late august!
• Myndin er af botni Mjóafjarðar á austurlandi, en þar er Fjarðardalur fyrir miðri mynd og svo sést vegurinn mjakast upp á Mjóafjarðarheiði vestast á myndinni. Skemmtileg nöfn eru á tindunum syðst á myndinni, og má líklega rekja nöfn þeirra til búsetu í fjarðarbotninum. Austast er Hádegistindur, vestan við hann er Miðdegistindur, þá kemur Miðtindur og vestast eru Nóntindar. Sé horft frá Fjarðarkoti má sjá ástæðuna fyrir nafngiftinni. 

JÚLÍ 2009:

Júlígetraunin var óvenjuþung en þrátt fyrir það bárust þónokkuð af réttum svörum.

Myndin var tekin árið 1990 og sýnir Bæjarfjall að norðan og Kvíhólafjöll að sunnan.

Nafn Ragnars Heiðars Þrastarsonar var dregið úr réttum svörum.

Hér koma upplýsingar sem nokkrir getspakir létu fljóta með:

• Á myndinni sést Bæjarfjall með áberandi gíg í miðju. Sunnar eru Kvíhólafjöll, en Kvíhólahvilft tengir þessi tvö fjöll saman. Fyrir vestan Kvíhólahvilft sjást svo Kvíhólar. Norðan Bæjarfjalls má svo sjá Þeistareyki og hvít, ummynduð hverasvæði þar í grend. Áberandi hvítt svæði sést efst til vinstri sem nefnist Hítur.
• Fyrst þið hafið ekki snúið sjónauka til tunglsins eru þetta Bæjarfjall og Kvíhólafjöll á Stór-Þeistareykjasvæðinu. 
• Á myndinni eru Bæjarfjall, norðar og Kvíhólafjöll, sunnar. Þessi fjöll eru milli Mývatnssveitar og Kelduhverfis, rétt sunnan Þeistareykja.
• Kringlótta fjallið heitir Bæjarfjall en hitt við hliðina Kvíhólafjöll. Þau eru í Suður-Þingeyjarsýslu norður af Mývatnssveit. Upplýsingar fengust með því að skoða yfirlitsmynd af landinu í stóra Íslandsatlasnum. Annars hefði ég ekki haft grænan grun þó ég sé að norðan.
• Hringlaga fjallið er Bæjarfjall, sunnan við það (neðar á myndinni) eru Kvíhólafjöll. Ljósu skellurnar norðan og norðvestan við Bæjarfjall er ummyndun frá jarðhitanum á Þeistareykjum sem eru norðan undir fjallinu.
• Á myndinni má sjá Bæjarfjall og Kvíhólafjöll. Þetta er mjög athyglisvert svæði jarðfræðilega og lögun Bæjarfjallsins er mjög sérstök. 

JÚNÍ 2009:

Þessi mynd var tekin af dönskum landmælingamönnum í upphafi síðustu aldar.

 Nöfn Hreins og Ingu (saman) voru dregin úr metfjölda svara. Við þökkum hinum fjölmörgu sem tóku þátt.

 Meðal svara sem bárust:

•  Myndin er tekin í Fnjóskadal. Bogabrúin yfir Fnjóská og horft til suðausturs yfir Vaglaskóg.
• Þetta er gamla brúin yfir Fnjóská – leiðin í Vaglaskóg forðum daga.
• Sýnist sem svo að þetta sé gamla bogabrúin yfir Fnjóská og stendur við Vaglaskóg. Sem var fyrsta steinbrú sinnar tegundar á Íslandi og lengsta steinbogabrú á norðurlöndum þegar hún var byggð.
• Þetta mun vera brúin yfir Fnjóska á. Myndin er tekin til norðvestur úr Vaglaskógi og horft í átt að Vaðlaheiði. Þetta er fyrsta steinbogabrú á Íslandi byggð árið 1908 og var talin ein lengsta brú þessarar gerðar í Evrópu þegar hún var byggð. 

MAÍ 2009: 

Myndin er frá 1998 og sýnir Keilir og Keilisbörn á Reykjanesi. 

Nafn Ómars Smára Ármannssonar var dregið úr fjölmörgum réttum lausnum.

 

APRÍL 2009:

Myndin er frá 1994 og sýnir Norðurárdal þar sem ekið er uppá Öxnadalsheiði á leið norður. 

Nokkur skemmtileg svör frá svarendum:

• Myndin er tekin í Norðurárdal þar sem ekið er upp á Öxnadalsheiðina þegar ekið er norður. Veginum sem er neðst á myndinni hefur nú verið breytt að hluta um þetta svæði. Fjallið hægra megin á myndinni er Reiðgilshnjúkur. Dalirnir efst hægra megin á myndinni nefnast (frá hægri til vinstri) Norðurárdalur, Miðdalur, Seljadalur. Fjallið fyrir miðri mynd mun vera Landshnjúkur.
• Sæl góða getraun, Ég held þetta sé Öxnadalsheiði. Hægra megin sé Hörgárdalsheiði síðan Miðdalur þá Seljadalur og Kleyfar.
• The picture shows the upper part of Norðurárdalur, North Iceland. Road n° 1 is in the bottom, crossing Norðurá wich comes from the top right corner. In the bottom left of the picture there’s a hayfield of Fremrikot farmland.
• Myndin sýnir mót Norðurár í Norðurárdal í Skagafirði og Krókár sem kemur ofan af Öxnadalsheiði. Seljadalur efst á myndinni. Öxnadalur neðst til vinstri. Reiðgilshnjúkur lengst til hægri. Landshnjúkur vinstramegin við miðja mynd.
• Myndin er frá Öxnadalsheiði. Neðst fyrir miðju eru ármót Krókár og Norðurár. Þar við brúna sést vinkilbeygjan, sem nú búið að taka af með nýjum vegi. Neðst, útundir vinstra horni myndarinnar sést á túnin á Fremrikotum, sem er innsti bær í byggð í Norðurárdal.
• Neðst á myndinni sést hvar þjóðvegur 1 liggur (lá) um Norðurárdal í Skagafirði upp á Öxnadalsheiði. Fyrir miðri mynd er Landshnjúkur, hægra megin (austan) við hann sameinast Horná og Miðdalsá við Norðurá. Heiðarsporður heitir hryggurinn sem skilur að Norðurárdal og Öxnadalsheiði.
• Þessi mynd er tekin á Tröllaskaga, nánar tiltekið sunnarlega. Sjá má veginn yfir Öxnadalshreiði neðst, með hinni alræmdu beygju sem hefur verið tekin af núna. Seljadalur er fyrir miðju , og fjallshlíð sem heitir Land. Hægra megin er dalur inn að Hörgárdalsheiði, skv. gömlum Atlasblöðum.
• Jökulsorfið landslag sunnanverðs Tröllaskaga blasir við á myndinni: Kleifahnjúkur og Reiðgilshnjúkur og á milli þeirra Norðurá. Syðst á myndinni sést í hringveginn um Norðurárdal og Öxnadalsheiði. 
• Myndin er tekin í Norðurárdal í Skagafirði. Neðst á myndinni sést þjóðvegurinn þar sem hann kemur inn dalinn frá vinstri, og tekur vinkilbeygju, fer yfir ána og upp á Öxnadalsheiði. Mér sýnist vera flutningabíll neðarlega í brekkunni skammt frá brúnni. Brúin sem er frá 1947 og vegurinn norðan árinnar eru nú aflögð eftir að nýr vegarkafli var tekinn í notkun sem sést ekki á myndinni. Norðurá kemur inná myndina ofan af Hörgárdalsheiði efst frá hægri á myndinni, rennur um Hálfdanartungur, og renna þar tvær ár saman við hana, þ.e.a.s. Horná sem kemur frá vinstri úr Seljadal, og í miðið kemur önnur á úr Miðdal (veit ekki nafnið á ánni). Ég hygg að áin sem kemur meðfram veginum ofan af Öxnadalsheiði frá hægri neðst á myndinni heiti Grjótá, og heitir sú Króká sem kemur inná myndina neðan frá og rennur í hana. Grjótá rennur svo í Norðurá rétt neðan við brúna, og er reyndar búið að þvera hana núna með nýja veginum, og var það gert með stóru stálplöturæsi á steyptum undirstöðum ef ég man rétt. Neðarlega vinstra megin má svo sjá Valagilsá sem rennur í Norðurá, saklaus að sjá, en getur orðið snefsin í vorleysingum. Mig rennir í grun að brúin á Valagilsá hafi verið orðin með þeim allra mjóstu sem voru á þjóðvegi nr. 1 áður en hún var aflögð. Skammt vestan Valagilsár neðst til vinstri á myndinni glittir líklega í túnhornið á Fremri-Kotum, sem er innri bær af tveimur sem eru í byggð í Norðurárdal. Hinn er Egilsá sem er sunnan ár mun neðar í dalnum. Þannig var nú það.

Magnús Fjalar Guðmundsson er heppinn vinningshafi aprílmánaðar.

FEBRÚAR – MARS 2009:

Myndin er frá 2000 og sýnir m.a. Móskarðahnúka austan við Esju, Leirvogsvatn og veginn til Þingvalla.

Hér eru nokkur svör með mörgum örnefnanna sem má hægt er að finna á myndinni:

• Á myndinni sést neðst til hægri Leirvogsvatn, Þingavallavegur liggur vestur-austur, Stardalur ofan við vatnið, neðst fyrir miðri mynd Seljabrekka, þar til norðurs afleggjarinn að Skeggjastöðum og síðan tekur við Þverárdalur í Esju.
• Mynd feb-mars er tekin af svæði ofan við Gljúfrastein í Mosfellsdal. Sjá má veginn til Þingvalla og veg til norðurs að Esju og efstu drögum Leirvogsár. 
• Myndin er af austanverðri Esju, Þverárdal, Móskarðshnjúkum, Skálafellsöxl og Leirvogsvatni. 
• Af fjöllum skal þarna helst telja austurhluta Esju, þ.e. Hátindur (Þverárdalur) síðan Móskarðshnúka (Svínaskarð) og loks Skálafell. Að sunnan sést þjóðvegurinn til Þingvalla og Leirvogsvatn. Bæjarnöfn mætti nefna Stardal, Skeljabrekku, Skeggjastaði og Hrafnhóla.

 Nafn Árna Geirssonar var dregið úr réttum svörum.

JANÚAR 2009:

Myndin er af Landmannalaugum og nágrenni, frá 1990. 

Nafn Jóns Smára Jónssonar var dregið úr réttum svörum.

DESEMBER 2008: 

Myndin er tekin í Borgarnesi árið 1910. 

Nafn Sigurðar Magnússonar var dregið úr réttum svörum. 

• Myndin er af húsunum við brúarsporðinn út í Brákarey í Borgarnesi þar sem Landnámssetrið er nú til húsa.
• Á myndinni sjást húsin við Búðarklett sem nú hýsa Landnámssetur og í baksýn er Hafnarfjall til hægri en Tungukollur til vinstri. Á milli þeirra er Seleyrargil.
• Því er til að svara að fjöllunum svipar helst til þess er getur að líta í suðurátt frá Borgarnesi, yfir Borgarfjörð, Skessuhorn, Skálafjall og Hafnarfjall, og húsin gætu sem best verið elstu hús kauptúnsins sem kaupmaðurinn Akra-Jón byggði á áttunda áratug nítjándu aldar, með byggingarnar Búðarklett og Pakkhúsið í forgrunni (undir hinum eiginlega Búðarkletti); hús sem hýsa um þessar mundir svonefnt Landnámssetur Íslands og hefur nú nærri öld eftir að myndin var tekin verið gerð nútímaleg tengibygging á milli húsanna sem nefnist Skálinn og sem hýsir jafnframt hluta af starfseminni. 
• Þetta er Borgarnes – Hafnarfjall í baksýn. Húsin á miðri myndinni eru húsin sem í dag mynda Landnámssetrið. Landfylling í víkinni breytir myndinni í dag. 

 NÓVEMBER 2008:

Rétt svar er Skjálftavötn en það myndaðist í jarðhræringum árið 1976.

Nafn Sveins H. Sverrissonar var dregið úr réttum svörum.

• Skúlagarður í Kelduhverfi er vestast á myndinni, brunnarnir við Lindarbrekku og Keldunes sjást vel, einnig vegurinn norður í sand að Þórunnarseli. Skjálftavatn myndaðist um miðja mynd.
• Þetta er skemmtileg mynd af landsvæði sem breyttist mikið. Væri tekin mynd af sama svæði núna kæmi væntanlega allt Skjálftavatn í Kelduhverfi inn á myndina. Stóra vatnsfallið er Bakkahlaup, vesturkvísl Jökulsár á Fjöllum, áin vinstra megin á myndinni heitir Litla á, rennur fyrst vestur og síðar norður og til sjávar í sama ós og Bakkahlaup. Bæirnir Keldunes, Framnes, Lindarbrekka og Hóll sjást á myndinni.
• Myndin er úr Kelduhverfi, áin er Jökulsá í Axarfirði, sem heitir reyndar Bakkahlaup á þessum kafla. Áin vinstra megin, neðan við miðja mynd er Litlaá. Við hana eru m.a. Keldunesbæirnir. Skjálftavatn, sem myndaðist í jarðhræringunum kringum 1975 nær yfir stóran hluta flatlendisins á myndinni. Ofarlega á myndinni, á bakka Jökulsár eru bæirnir Syðri-Bakki og Þórseyri. Gegnt þeim er bærinn Ytri-Bakki, í eyði frá 1964. Til gamans get ég sagt ykkur frá æskuminningu, sem ég man óljóst eftir. Þá fór ég með foreldrum mínum í heimsókn til Gunnlaugs og Guðbjargar sem bjuggu á Ytr-bakka. Við áttum heima á Kópaskeri. Við fórum á bíl í Syðri-bakka og síðan sótti Gunnlaugur okkur á árabát yfir Bakkahlaupið. Þetta var í fyrsta skipti sem ég kom í bát og ég man að ég var hræddur, hélt að báturinn myndi sökkva, það var straumur í ánni. 

OKTÓBER 2008:

Eskifjörður, Hólmatindur í baksýn. Mynd tekin af dönskum mælingamönnum í september 1908.

Nafn Ragnars Antoniussen var dregið úr réttum svörum.

• Á myndinni sést hólmaháls í fjarska og er þetta sennilega tekið innan við mjóeyri í eskifirði.
• Myndin er tekin við Hvalstöð sem var út í Helgustaðahreppi hér á árum áður. Í baksýn er Hólmatindur við Eskifjörð.
• Myndin er tekin á Eskifirði líklega rétt utan við Mjóeyri, fjallið í baksýn er Hólmatindur.
• Undirritaður hefur flaskað á réttu svari oftar en einu sinni og enn skal rennt blint í sjóinn. Þessi mynd sem danskir mælingamenn tóku á ferðum sínum um landið í september 1908 er að öllum líkindum tekin á Austfjörðum, nánar tiltekið í Mjóeyrarvíkinni á Eskifirði, rétt utan við gömlu bræðsluna, með Hólmatind (og Hólmaháls) í baksýn. Bátana er erfiðara að nefna svo ekki skal reynt að giska þar. Svar sent seinna: Við nánari athugun sýnist mér að mynd sem danskir mælingamenn tóku í Reyðarfirði.í september 1908 sé tekin við gömlu hvalstöðina sem reist var á Svínaskálastekk í Reyðarfirði af danska félaginu Hvalindustri Aktieselskabet Island árið 1904 og var við lýði í átta ár á vegum Ásgeirsverslunar á Ísafirði. Þar er aðdjúpt enda má sjá bæði hvalveiðiskip með hval og flutningaskip rétt uppi í fjörusteinum. Norðmenn önnuðust hvalskurðinn en framkvæmdastjóri stöðvarinnar hét Evensen. Svínaskálastekkur tilheyrði áður Helgustaðahreppi sem nú er hluti af Fjarðabyggð. Í baksýn er eftir sem áður Hólmatindur og hluti af Hólmahálsi Eskifjarðarmegin.
• Myndin er af Hólmatindi milli Eskifjarðar og Reyðarfjarðar. Miðað við sjónarhornið er hún tekin á Mjóeyri við Eskifjörð, eða þar um bil.
• Þessi mynd er tekin á Eskifirði, fjallið í bakgrunni heitir Hólmatindur og stendur beint á móti bænum Eskifirði. 
• Þessi mynd af hvalveiðibátum gæti verið tekin í landi Svínaskála í Helgustaðahreppi, fyrir utan Eskifjörð. Hólmatindur í baksýn. 
• Þessi mynd er tekin við hvalstöð sem eitt sinn var í fjöruborðinu við Svínaskála þá í Helgustaðahreppi í Suður-Múlasýslu, nú Fjarðabyggð. Nánar tiltekið skammt fyrir utan byggðina í Eskifirði við norðanverðan Reyðarfjörð. Fjallið sem blasir við á myndinni er Hólmatindur, sá er mælingamennirnir dönsku mældu 985 m hátt yfir sjávarmáli. Á þeim stað sem hvalstöðin norska var hefur undanfarna áratugi verið hákarlaverkun.  

ÁGÚST – SEPTEMBER 2008:

Snæfellsjökull 1991 (norður snýr til hægri).

Nafn Yann Pichon var dregið úr réttum svörum og fær hann að velja sér loftmynd.

JÚLÍ 2008:

Þykkvibær árið 1967.

Nafn Halldórs K Hjartarsonar var dregið úr mörgum réttum svörum.

JÚNÍ 2008:

Hvesta og Hvestudalur í Arnarfirði

Nafn Baldvins Einarssonar var dregið úr fjölmörgum réttum svörum.

• Hvestudalur við sunnanverðan Arnarfjörð, ljósi sandurinn sem ágætlega sést og hálfgert sjávarlón þar heitir Vaðall. Vegurinn út í Selárdal liggur þarna um og er þetta alveg einstaklega fallegt svæði.
• Fremrihvesta Hvestunúpur t.h. en Hringsdalsnúpur t.v. Ströndin heitir Vaðall, Vesturbyggð fyrrum Ketildalahreppur.
• Myndin er af Hvestu í Arnarfirði, Hvestudalur gengur uppaf hvítu ströndinni sem eru svo einkennandi fyrir Vestfirði, Andahvilft er hægra megin (innar) og Eyrarfjall til vinstri (utar) og skilur að Hvestu og Hringsdal. Hvesta hefur fengið þann vafasama heiður nýverið að fá að hýsa olíuhreinsunarstöð í framtíðinni.
• Þetta er Hvestudalur fyrir miðri mynd Hringdalsnúpur vinstramegin og Hvestunúpur hægramegin hvíti sandurinn heitir Vaðall og dalurinn sem gengur inn í fjallið til hægri og niður á myndinni heitir Andarhvilft. Túnin á myndinni eru frá eyðibýlinu Neðrihvestu.
• Há fjöll, skeljasandsfjörur og skelfilegir vegir við sjóinn; þessi vík hlýtur að vera á Vestfjörðum. Nánar tiltekið í Hvestudal í Arnarfirði (rétt vestan við Bíldudal). Hvestuá og Hestá í miðjum dal, Hvestunúpur í SA með áberandi formi Andahvilftar og Eyrarfjall / Hringsdalsnúpur í NV. Á myndinni sjást bæjarhúsin og túnin á Fremrihvestu. 
• Á loftmynd júnímánaðar sér yfir fjallið Nónhorn og Hvestu (Hvestudal) í Arnarfirði og slegin tún við bæinn Fremri-Hvestu, sem áður fyrr heyrði til Ketildalahreppi í V-Barðastrandasýslu, en heitir nú í Vesturbyggð.
• Samkvæmt fréttum Ríkisútvarpsins 30. maí sl. gera sveitarfélagið Vesturbyggð og fyrirtækið Íslenskur hátækniiðnaður því skóna að reisa á þessum fallega stað rússneska oliuhreinsunarstöð með öllu sem því heyrir til.
• The aerial view shows Hvestudalur in Arnarfjörður, a few kilometers west of Bíldudalur. White sands of Hvestuá estuary give evidence that Iceland is not only made of lava… 
• Þetta mun vera Hvestudalur við Arnarfjörð á Vestfjörðum. Þar er fyrirhuguð ein olíuhreinsistöð eða svo.

 

MAÍ 2008:

Stykkishólmur

Hér má sjá upplýsingar sem fylgdu með maímyndinni:

•  I love Iceland very much and I know it pretty well. I would like to answer a riddle you are asking on your website now in May. This is Stykkishólmur. The second white roof from the bottom is Norska húsið (now is black). The most characteristic elements on this picture are numerous islands on Breiðafjörður bay.
• Þessi mynd er tekin á Stykkishólmi. Húsið fyrir miðri mynd gekk einhverntíma undir nafninu Settuhöllin og gott ef ég leigði ekki herbergið með glugganum lengst hægra megin á annari hæð þegar ég var á sjó þarna sumarið 1976. Það er búið að gera það mjög fallega upp í dag. Kirkjan stendur líklega ennþá. Svo sést inn eftir Breiðafirði í átt til Brokeyjar. 
• Myndin er tekin í Stykkishólmi. Væntanlega ofan af Bókhlöðuhöfða og í austur. Kirkjan sést nálægt miðri mynd, Narfeyrarhús til vinstri og fleiri þekkt gömul hús.
• Undirritaður þykist þess viss að ljósmynd í getraun maí-mánaðar sé tekin í Stykkishólmi á ríflega miðjum fyrsta tug síðustu aldar. Auðþekkt eru aldargömul timburhús sem fengið hafa að halda sér með góðu viðhaldi og endurreisn; Egilshús nær á miðri mynd, Clausenshús og Norska húsið í forgrunni, ennfremur verslunarhús Tang & Riis og Narfeyrarhús nær firðinum, sem og gamla kirkjan sem lokið var við um 1880, og hefur haldið upprunalegu útliti til vorra daga ef frá er skilinn kirkjuturninn sem nú er örlítið breyttur. Í baksviði skarta svo Stykkið, Súgandisey og ótaldar eyjar á Breiðafirði.
• Myndin er frá Stykkishólmi. Hér er svo aðeins nánar um myndina sem er tekin á Mylluhöfða þar sem Vatnasafnið er núna. Margt merkilegt má sjá á þessarri mynd. Húsið fremst í myndinni er Clausenshús frá 1874, Sigurður Eiríksson var þar yfirsmiður. Þar beint fyrir aftan má sjá í þakið á Norska húsinu og svo þar beint aftan við má sjá í reisulegt Egilssenshús sem byggt var árið 1867. Hægra megin við það er svo Narfeyrarhús frá 1906. Menn þekkja það núna sem Narfeyrarstofu, þar er núna samnefndur veitingarstaður. Svo gamla kirkjan sem byggð var árið 1878. Hægra megin við hana er svo Möllershús, þar bjó póstmeistari staðarins, sem var flutt á Skúlagötu. Efst í vinstra horni myndarinn er svo hið reisulega hús „Tang og Riis“ frá 1890 sem byggt var fyrir Gramsverslun. Beint fyrir framan það er svo hús sem búið er að rífa. En þetta var svokallað gamla pakkús sem var í raun Möllersapótek. Ekki má gleyma því að túnið á miðri myndinni (fyrir framan kirkjuna) er Jósepstún og Frúarhúsið, frá 1870, er hægra megin við túnið.
• Þessi mynd er frá Stykkishólmi, tekin á Þinghúshöfða þar sem gamla bókasafnið var en Vatnasafn er í dag.

 APRÍL 2008:

 Myndin er tekin á Skólavörðuholti . Á myndinni má m.a. sjá Reykjavíkurtjörn og Landakotsspítala í smíðum. Óvenju lítið var um röng svör í þetta skiptið og voru innsend svör furðu mörg þrátt fyrir erfiða getraun.

Nafn Ísars Guðna Arnarsonar var dregið úr réttum svörum.

Hér má sjá upplýsingar sem fylgdu með svörum við aprílgetraun:

• Ég vil meina að þessi mynd sé tekin af Skólavörðuholti yfir Tjörnina.
• Ætli þetta sé ekki Landakotskirkja í smíðum á bakvið kirkjuna fyrir miðri mynd. Seltjarnarnes vinstra megin. 
• Mér sýnist þessi mynd vera tekin af Skólavörðuholtinu í átt að Landakoti. Þarna sést kaþólska timburkirkjan og spítalinn sem tekinn var í notkun 1902. 
• The picture should be an old view of Reykjavík, from Skólavörðurholt toward Tjörnin pond, with Seltjarnarnes in the left background. On a 1919 view of Reykjavik, exposed in Árbærsafn, the church on top of the hill (west of Tjörnin) looks different so your picture may be older; say late 19 th? 
• Þessi mynd er tekin í Reykjavík, frá Skólavörðuholti og í vestur yfir á Landakotshæð. Kirkjan sem sést fyrir miðri mynd er gamla Landakotskirkjan sem byggð var árið 1897 og varð seinna íþróttahús ÍR. Að baki henni virðist gamli Landakotsspítalinn vera í byggingu, en hann var reistur 1902. 
• Ég held að þetta sé tekið á Skólavörðuholtinu. Ætti meira að segja að geta fundið út ca hvenær því þarna er Landakotsspítalinn í byggingu. Sést á Tjörnina og yfir á Seltjarnarnesið, einnig í Engey. Kannski er hlaðna húsið í forgrunni Hegningarhúsið.
• Þessi mynd er auðvitað úr Reykjavík, kirkjan á myndinni er komin á Minjasafn Reykjavíkur (ÍR -húsið).
• Myndin er tekin af Skólavörðuholtinu og yfir Þingholtin, það glittir í Tjörnina og í lengri fjarska Eiðsgrand og Seltjarnarnesið.
• Ég tel að myndin sé af Reykjavík, tekin úr Þingholtunum, sést í Dómkirkjuna og Landsímahúsið í fjarska.
• Myndin er af Reykjavík – sennilega tekin af Skólavörðuholtinu. Til hægri sést í kunnuglegt steinhús en fjær fyrir miðri mynd sýnist mér kaþólska kirkjan á Landakotsjörðinni vera í byggingu og þannig er væntanlega hægt að tímasetja myndina. Tjörnin til vinstri.
• Þetta gæti verið Reykjavík ofan af Skólavörðuholti. Hægra megin glittir þá í Örfirisey en Tjörnina til vinstri. Seltjarnarnesið er ofar vinstra megiin og á meintu Landakotstúni stendur kirkja…

FEBRÚAR-MARS 2008: 

Rétt svar er Patreksfjörður. Fjölmörg rétt svör bárust og var nafn Hafsteins Hafliðasonar dregið úr réttum lausnum.

Eins og fyrr fylgdu ítarlegar upplýsingar með nokkrum svaranna:

• Frá Vatneyri að Mikladal í Patreksfirði.
• Svarið við getrauninni er Patreksfjörður. Neðst í skýringunum stendur „Vatneyri“ og „Geirseyri“, en ef mér skjátlast ekki, þá heitir kauptúnið í Patreksfirði Vatneyri, eða hét það a.m.k.
• Þetta mun vera Patreksfjörður sem er í samnefndum firði. Patreksfjörður stendur á Geirseyri og liggur niður á Vatneyri.
• Staðurinn á myndinni er Patreksfjörður sem stendur norðan við samnefndan fjörð og heitir eftir Patreki helga biskupi í Suðureyjum. Kauptúnið stendur fyrir mynnum Mikladals og Litladals, á svonefndri Geirseyri. Þaðan teygist byggðin stuttan spöl út með hárri og brattri fjallshlíð niður á Vatneyri sem er lág og slétt malareyri.
• Ég tel að kortið sýni Vatneyri við Patreksfjörð. Staðurinn dró nafn sitt af vatninu á eyrinni sem sést vel á kortinu. Síðar var vatnið grafið út og gerð höfn. Staðurinn heitir í dag Patreksfjörður.
• Þetta er bæjarteikning frá Patreksfirði og nær hún frá Vatneyri og inn fyrir vegamótin upp á Mikladal.
• Patreksfjörður – Kaupstaður, áður kallaður Vatneyri og Geirseyri. Vatneyri er vestanmegin ásamt höfninni en Geirseyri austanmegin upp í dalinn.

 JANÚAR 2008:

 Janúar getraunin var nokkuð þung en þrátt fyrir það bárust mörg góð og rétt svör:

 Loftmyndin sýnist vera af svæði við suðurbotn Þistilfjarðar.

•  Þarna milli ánna, Hölknár (til vesturs/vinstri) og Laxár (til austurs/hægri) eru Dalsmelar innan við Tumavík.
• Svæðið er við minni Laxárdals, þar sem samnefndur bær er, ásamt Holti og þar kemur skýring á hver „formslær“ í túnið sitt. Ströndin hefst við Austurkrók vestast og ýmsir „krókar“ koma til sögu þegar farið er til austurs og endar norðarlega í Gunnarsstaðakrók, sunnan Langatangavíkur. Sunnan þjóðvegar er Hundsvatn. Vegurinn sem beygir til suðurs inn Gunnarsstaðaháls, en þó sjást ekki Gunnarsstaðir við botn Lónafjarðar. Þaðan sem m.a. Steingrímur Sigfússon, alþ.m. er frá. Þórshöfn er austan og norðan við þann fjörð á Langanesrótum.
• Vatnið á myndinni heitir Hundsvatn. Myndin er tekin í Þistilfirði og túnin fyrir miðri mynd eru á Dalsmelum. Áin í norðvesturhorninu er Hölkná. Túnin neðst fyrir miðri mynd eru tún Laxárdals og bærinn Holt er rétt sunnan við neðri mörkin á myndinni.
• Víkin heitir Tumavík og svæðið neðan vegar nefnist Dalsmelar þar sem túnin eru. Áin vinstra megin á myndinn nefnist Hölkná og tanginn hægra megin nefnist Laxártangi. Fyrir ofan veg má sjá Hundsvatn sem er í minni Laxárdals. Textinn Holt á túninu er örugglega kominn til vegna þess að ábúendur Holts í Laxárdal slá túnin á Dalsmelum og hafa í gamni sínu merkt sér staðinn svo vel að hann sjáist úr lofti.

Verðlaunahafi janúargetraunar er Gísli Hermannsson.

Landmælingar Íslands hafa á undanförnum árum aflað SPOT-5 gervitunglamynda með 2,5m greinihæfni af öllu landinu.

Fjarkönnunargervitungl mæla endurvarp sólargeislunar frá yfirborði jarðar á nokkrum aðgreindum bylgjulengdabilum eða rásum á sýnilegu og nærinnrauðu sviði og þessar mælingar er hægt að setja saman með mismunandi hætti í litmynd.

Hér má sjá lítinn hluta úr innrauðri SPOT-5 mynd en á slíkum myndum kemur gróið land fram í rauðum litum og er liturinn rauðari eftir því sem gróðurinn er meiri eða þróttmeiri.

Takið eftir að gárungar hafa slegið orðið HOLT í eitt túnið.

NÓVEMBER-DESEMBER 2007:

Við síðustu spurningu barst fjöldi réttra svara. Á meðal réttra svara voru nokkur mjög góð og ítarleg svör og má sjá nokkur þeirra hér að neðan.

• Myndin er tekin rétt vestan við Hornafjörð nánar tiltekið á Mýrum. Höfðinn sem gengur þarna í sjó fram heitir Skinneyjarhöfði, víkin austan við hann Skinneyjarvík og fjaran þar austan við er í daglegu tali nefnd Skinneyjarsandur, þar réru bændur af Mýrum til fiskjar allt fram til 1962. Bæirnir sem sjást á myndinni eru Borg, Nýpugarðar og Einholt en einnig eyðibýlið Bakki. Áin á myndinni Hólmsá á Mýrum breytti um farveg árið 2002 og rennur nú til sjávar í Skinneyjarvík og áreyrarnar sem eru mest áberandi á myndinni eru orðnar þurrlendi og eru óðum að gróa upp.
• Loftmyndin er af Mýrum í Austur-Skaftafellssýslu. Áin sem er brúuð ofarlega til vinstri á myndinni er Hólmsá. Nokkrir bæir og eyðibýli sjást, vestan Hólmsár sést neðri bærinn í Flatey, austan Hólmsár sést meðal annars Borg, Nýpugarðar og Baldurshagi. Kletturinn í fjörunni neðst á myndinni er Skinneyjarhöfði.
• Myndin er af ósum Hólmsár A-Skaftafellssýslu, Skinneyjarhöfði og fræg Skinney sem frægt útgerðarfyrirtæki er nefnt eftir.

 Verðlaunahafi síðustu getraunar er Kristinn Óskarsson.