Landmælingar Íslands vilja að gögn þeirra séu notuð af sem flestum. Árið 2011 var sú ákvörðun tekin að bjóða IS 500V gögn stofnunarinnar gjaldfrjáls.

Hægt er að fá gögnin afhent gegn þjónustugjaldi sem er kr. 3850,- án vsk og er gerður afnotasamningur þar um.

Ef birta á gögnin og/eða dreifa þeim þarf að fá leyfi hjá Landmælingum Íslands og greiða birtingargjald fyrir.

 

Hægt er að fá gögnin á gdb, shp og dwg formi.

Áhugasamir sendi tölvupóst á lmi@lmi.is.

 

Fljótlega eftir áramót kemur út frumvarp að 2. útgáfu staðalsins ÍST 120 Skráning og flokkun landupplýsinga – Fitjuskrár. Í samræmi við breytingar á umfangi staðalsins eru fitjuskrárnar sem tengjast staðlinum núna aðgengilegar hér á heimasíðu LMÍ.

Öll skjölin eru enn sem komið er drög að fitjuskrám en verða gefin út um leið og önnur útgáfa staðalsins ÍST 120 Skráning og flokkun landupplýsinga - Fitjuskrá verður samþykkt.

Nú er komið gott aðgengi að öllum bæjarteikningunum, frumteikningum Atlaskorta og ljósmyndum sem landmælingadeild herforingjaráðs Dana teiknaði á árunum 1902-1920.

 

Í bæjarteikningaskránni eru sérmælingar og gerð uppdrátta af íslenskum bæjum, þéttbýlissvæðum og þorpum, þá er hægt að skoða frumteikningar Atlaskorta auk þeirra ljósmynda sem mælingamennirnir tóku þegar þeir voru við störf sín.

 

Þann 15. desember kom út útgáfa 3.2 af IS 50V gagnagrunni Landmælinga Íslands.

 

Helsta áhersla þessarar útgáfu lá í uppfærslu á vatnafarslaginu en um 19% landsins hefur verið uppfært. Nánar er hægt að lesa um gögnin í skýrslu um IS 50V 3.2. 

 

 

Stafrænt loftmyndasafn LMÍ var gert aðgengilegt notendum þann 1. desember síðastliðinn hér á heimasíðu stofnunarinnar. Í safninu hafa notendur aðgang að um 20.000 loftmyndum frá árunum 1987-2000 en stöðugt er unnið að skönnun þeirra mynda sem Landmælingar Íslands hafa í filmusafni sínu og munu þær bætast við jafnóðum og  þær verða skannaðar.

Leiðbeiningar um notkun safnsins er að finna á forsíðu þess en notandinn þarf að leita eftir fluglínum af korti og ártölum til að hafa upp á þeirri mynd sem við á. Loftmyndirnar á vefnum eru í lágri upplausn en hægt er að panta myndir í fullri upplausn hjá loftmyndir@lmi.is og eru innheimt þjónustugjöld vegna þess samkvæmt gjaldskrá.

Landmælingar Íslands opnuðu í dag Landupplýsingagátt (e: geoportal) í tengslum við nýtt hlutverk sitt er snýr að grunngerð fyrir stafrænar landupplýsingar.  

 

Landupplýsingagáttin er vefsvæði þar sem notendur geta leitað eftir lýsigögnum um landupplýsingar opinberra aðila en um leið tengist hún INSPIRE-verkefni Evrópusambandsins.

Landupplýsingagáttin er nú opin fyrir aðra opinbera aðila til skráningar en hún mun þróast áfram á næstu mánuðum. Opnun á landupplýsingagáttinni er stórt skref í átt að innleiðingu laga um grunngerð fyrir stafrænar upplýsingar á Íslandi. 

Síðastliðinn föstudag barst Landmælingum Íslands höfðingleg gjöf en þá færði Sigurrós Júlíusdóttir stofnuninni ljósmynd að gjöf og til varðveislu.

Ljósmyndin er af tveimur dönskum landmælingamönnum á hestbaki sem voru við mælingar á Íslandi líklega á fyrsta áratug síðustu aldar.

Um er að ræða yfirmenn í mælingadeild danska herforingjaráðsins en eins og margir vita unnu Danir að kortagerð af Íslandi frá því í kringum aldamót til ársins 1945 og unnu mikið afrek á því sviði. Enn eru kortin sem unnin voru af Dönum notuð á Íslandi og eru þau oft kölluð herforingjaráðskort.

 

Magnús Guðmundsson forstjóri Landmælinga Íslands og Sigurrós Júlíusdóttir með ljósmyndina.

Það var Sigurrós Júlíusdóttir sem færði Landmælingum Íslands ljósmyndina að gjöf og til varðveislu um ókomin ár en myndin var áður í eigu afa hennar sem hét Veturliði Guðbjartsson. Veturliði var um tíma aðstoðarmaður dönsku herforingjanna þegar þeir voru við mælingar á Íslandi. Landmælingar Íslands vilja þakka Sigurrós innilega fyrir gjöfina og mun ljósmyndin verða skráð og komið á stafrænt form til að tryggja aðgengi að henni m.a. á vefnum. 

Landmælingar Íslands fengu þann 3. nóvember 2011 viðurkenningu fyrir nýsköpun í opinberum rekstri fyrir verkefnið „"Örnefni á vefnum“ á ráðstefnu á Grand Hótel í Reykjavík.

Viðurkenningin var afhent af Steingrími J. Sigfússyni fjármálaráðherra en að ráðstefnunni stóðu Félag forstöðumanna ríkisstofnana, Stofnun stjórnsýslufræða við Háskóla Íslands, fjármálaráðuneytið, Rannís og Nýsköpunarmiðstöð Íslands.

Á meðfylgjandi ljósmynd eru starfsmenn Landmælinga Íslands sem unnið hafa að verkefninu „Örnefni á vefnum“, f.v. Brandur Sigurjónsson, Eydís Líndal Finnbogadóttir, Rannveig Lydia Benediktsdóttir, Ragnar Þórðarson og Samúel Jón Gunnarsson (á myndina vantar Þóreyju Dalrós Þórðardóttur).

Verkefnið „Örnefni á vefnum“ snýst um að byggja upp gagnagrunn um örnefni af öllu Íslandi og að hanna örnefnasjá þar sem megin markmiðið er að opna aðgengi að örnefnum á auðveldan og notendavænan hátt. Örnefnagrunnurinn inniheldur yfir 58.000 örnefni og fer þeim sífellt fjölgandi enda mikill áhugi almennings á varðveislu örnefna og því um leið sögu íslenskrar þjóðar og náttúru. Örnefnagrunnurinn hefur á undanförnum árum einnig verið unninn í samvinnu við nafnfræðisvið Stofnunar Árna Magnússonar í íslenskum fræðum. Þá hafa valdir skráningaraðilar einnig rétt til að skrá örnefni í grunninn. Í vefsjánni eru útgefin örnefni en það eru örnefni sem eru hluti af örnefnum IS 50V gagnagrunnsins en tvær útgáfur koma út á ári, að vori og vetri.

 

Lögreglan á Hvolsvelli hlaut Nýsköpunarverðlaun í opinberum rekstri 2011 vegna verkefnisins „Skipulag rýminga vegna jökulhlaupa sem fylgja eldgosum í Kötlu og Eyjafjallajökli. Samstarf íbúa og almannavarnayfirvalda“. 

 

Þá fengu auk verkefnis Landmælinga Íslands eftirtalin tvö verkefni sérstaka viðurkenningu: Blindrabókasafn Íslands fyrir verkefnið „Yfirfærsla bókakosts Blindrabókasafns Íslands yfir á stafrænt form“ og Lögreglan á höfuðborgarsvæðinu fyrir verkefnið „Notkun samfélagsmiðla (Facebook og Twitter) á sviði löggæslu“.

Nánari upplýsingar eru á nýsköpunarvefnum sem var opnaður á ráðstefnunni um nýsköpun í opinberum rekstri.

Fimmtudaginn 20. október var ráðstefnan Landupplýsingar 2011 haldin á Grand Hótel.

Landmælingar Íslands áttu þrjá fyrirlesara þá Gunnar H. Kristinsson sem talaði um 2. útgáfu ÍST 120 staðalsins, Jóhann Helgason sem talaði um uppfærslu á vatnagrunni IS 50V á árinu 2011 og Samúel Jón Gunnarsson sem fræddi viðstadda um INSPIRE landupplýsingagátt og opinn frjálsan hugbúnað.

 

Í tilefni af degi íslenskrar náttúru opna Landmælingar Íslands nýja örnefnasjá á vefsíðunni  http://atlas.lmi.is/ornefnasja/

 

Örnefnagagnagrunnurinn

Landmælingar Íslands vinna að því að byggja upp GNSS-jarðstöðvakerfi sem starfar í rauntíma. Við hönnun kerfisins var leitast við að nýta sem flestar stöðvar sem nú þegar eru í gangi og notaðar eru í öðrum verkefnum. 

Nú nýverið var jarðstöð við Fjórðungsöldu tengd við kerfið en hún tilheyrir einmitt alþjóðlega rannsóknarverkefninu CHIL (Central Highland Iceland GPS) og er í umsjá Háskóla Íslands og Veðurstofunnar. Einnig var bætt við stöð við Mývatn og er hún í umsjón German Geodetic Research Institute í München. Mæligögn frá stöðvunum streyma til LMÍ í rauntíma og eru þau aðgengileg í GNWEB-þjónustu LMÍ.

Alls eru stöðvarnar orðnar 7 í GNSS-jarðstöðvakerfi LMÍ; í Reykjavík, á Ísafirði, á Akureyri, við Mývatn, á Heiðarseli rétt norðan við Egilsstaði, við Fjórðungsöldu og á Höfn í Hornafirði en stefnt er á að bæta enn fleiri stöðvum við á þessu ári.

Umhverfisráðherra, Svandís Svavarsdóttir, hefur kynnt ríkisstjórn hvítbók sem nefnd um endurskoðun náttúruverndarlaga hefur unnið en í henni felst heildarúttekt á lagaumhverfi náttúruverndar á Íslandi.

 

Samkvæmt frumvarpi til breytinga á náttúruverndarlögum og Hvítbók um náttúruvernd fá Landmælingar Íslands mikilvægt hlutverk við að halda úti gagnagrunni um opinbera vegi og slóða á Íslandi.

 

Fréttin á vef umhverfisráðuneytisins.

 

Fimmtudaginn 18. ágúst og föstudaginn 19. ágúst fengu Landmælingar Íslands heimsókn frá norrænum kollegum.

Á föstudeginum kom síðan Tromsö skrifstofa systurstofnunar LMÍ hjá Statens Kartverk í Noregi í heimsókn. Þau héldu kynningu á sínum verkefnum fyrir starfsmenn. 

Þess má síðan geta að laugardaginn 20. ágúst tóku allir starfsmennirnir frá Tromsö þátt í Reykjavíkurmaraþoninu. 

Ný gjaldskrá fyrir Landmælingar Íslands hefur verið samþykkt af umhverfisráðherra. Í gjaldskránni er tekið mið af verðlagsbreytingum undanfarinna ára en einnig hafa verið gerðar ýmsar lagfæringar í takt við breyttar áherslur. 

Meðal breytinga má nefna að ekki er lengur rukkað fyrir IS 500V gögnin en tekið er þjónustugjald fyrir afhendingu gagnanna. Birting á gögnunum eru áfram háð birtingargjaldi. Verð á loftmyndum sem þegar hafa verið skannaðar hefur verið lækkað en verð vegna skönnunar á loftmyndum (sérpantana) hefur hækkað. Þá hafa birtingagjöld verið endurskoðuð m.a. til þess að ná utan um nýjar birtingarmyndir s.s. á netinu.

Landmælingar Íslands hafa opnað nýja vefsíðu sem fjallar um grunngerð fyrir stafrænar landupplýsingar á Íslandi og INSPIRE.  Þar má m.a. finna tengla í áhugaverðar vefsíður sem tengjast  grunngerð fyrir landupplýsingar og INSPIRE tilskipun ESB. Vefsíðan er á slóðinni: inspire.lmi.is

 

Þá hafa Landmælingar Íslands gefið út fréttabréf um efnið sem lesa má hér.

 

 

Þriðjudaginn 31. maí var haldinn kynningafundur á nýjum útgáfum IS 50V gagnagrunnsins. Til fundarins mættu 16 notendur frá 12 stofnunum og fyrirtækjum. Farið var yfir það sem er nýtt í IS 50V 3.0 og 3.1 útgáfunum og framtíðaráætlanir fyrir uppfærslu grunnsins voru kynntar. Að auki voru hugmyndir um vefþjónustur ræddar og farið yfir IST 120 staðalinn. Fundarmenn voru duglegir við að spyrja starfsmenn LMÍ spurninga er varða framleiðsluna og koma með ábendingar um hvað betur mætti fara svo að grunnurinn nýttist notendum enn betur. 

 Landmælingar Íslands héldu samsvarandi fund fyrir ári síðan og er gert ráð fyrir að slíkir fundir verði haldnir árlega. Stofnunin telur mikilvægt að vera í góðu sambandi við notendur til að tryggja nákvæmni og notagildi IS 50V gagnanna auk þess að koma með nýjungar í framleiðslunni.  Þetta er í góðu samræmi við ný gildi stofnunarinnar: Nákvæmni, Notagildi, Nýsköpun.   

 

 

Landmælingar Íslands urðu í sjötta sæti í vali á stofnun ársins í flokki minni stofnana og einnig ef miðað er við heildarfjölda.

SFR - stéttarfélag í almannaþjónustu stóð nú í sjötta sinn að þessu vali. Könnun var gerð meðal allra starfsmanna stofnunarinnar óháð því í hvaða stéttarfélagi þeir væru. Ljóst er að sú einkunn sem þeir gefa vinnustað sínum er vitnisburður um góðan starfsanda, starfsmannastefnu og stjórnunar Landmælinga Íslands, en heildareinkunn hækkaði milli ára úr 4,40 í 4,52.

 

Landmælingar Íslands hafa tekið þátt í þessari könnun frá upphafi og hafa ætíð verið framarlega í flokki. Árið 2006 varð stofnunin í 10 sæti og árið eftir í því 9. Árið 2008 var farið að skipta stofnunum upp í minni og stærri stofnanir og urðu Landmælingar Íslands þá í sjötta sæti í heild og sjötta sæti minni stofnana. Í fyrra varð stofnunin svo í 5. sæti heildarinnar og einnig í flokki minni stofnana.

 

Heimasíða SFR

 

 

Mánudaginn 2. maí voru samþykkt á Alþingi lög um grunngerð fyrir stafrænar landupplýsingar nr. 44/2011. Markmið laganna er að byggja upp og viðhalda grunngerð fyrir stafrænar landupplýsingar á vegum stjórnvalda og tryggja aðgengi stjórnvalda og almennings að landupplýsingum.

Unnið hefur verið í nokkurn tíma að gerð þessara laga og tengjast þau svokallaðri INSPIRE-tilskipun Evrópusambandsins.

Með lögunum fá Landmælingar Íslands nýtt hlutverk en stofnuninni er falið að fara með framkvæmd laganna, einkum því sem lítur að svonefndri landupplýsingagátt, þar sem framkvæmd laganna fellur undir umhverfisráðuneytið.

 

Landmælingar Íslands fagna því að nú séu lögin samþykkt og hlakka til að takast á við nýtt og umfangsmikið verkefni sem sýnt þykir að muni verða til hagsbóta fyrir allt samfélagið.

 

Til stendur hjá Landmælingum Íslands að gefa út fréttabréf vegna grunngerðar fyrir stafrænar landupplýsingar og innleiðingu INSPIRE-tilskipunarinnar á næstu mánuðum til að sem flestir geti fylgst með framgangi mála enda er hér um sameiginlegt verkefni fjölmargra opinberra aðila að ræða.

 

Ferill málsins á Alþingi

Upplýsingar um INSPIRE

 

 

Á dögunum komu tveir starfsmenn Skógasafns í heimsókn til Landmælinga Íslands. Þeir voru komnir til að sækja muni sem hafa verið í eigu stofnunarinnar til margra ára.

 

Flestir munanna voru til sýnis á sýningunni „Í rétta átt“ á Byggðasafninu að Görðum sem tekin var niður síðasta vor.  

 

Stærsti gripurinn sem fer til varðveislu á Skógasafn er Willysjeppi árgerð 1946, sem keyptur var af Landmælingum Íslands í kringum árið 1995 og var endurgerður til að líkjast þeim jeppum sem notaðir voru í mælingaleiðöngrum.

Aðrir munir sem afhentir voru Skógasafni eru m.a. vaxmyndadúkkan Teddi og bakpokinn hans, hornamælitæki og þrífótur, mælipunktur, mælistika, basis, vindhlíf, vinnulukt, klifsöðull, myndir af landmælingamönnum og veggspjald frá sýningunni „Í rétta átt“.

 

Landmælingar Íslands hafa gert samkomulag við Skógasafn um varðveislu og eign þessara muna um ókomna tíð og erum við safninu afar þakklát fyrir gefa þessum gömlu munum áframhaldandi líf með því að leyfa gestum og gangandi að skoða þá og fræðast um landmælingar fyrri tíma.

 

 

 

Nú er ársskýrsla Landmælinga Íslands fyrir árið 2010 komin út. 

 

Í ársskýrslunni er að finna ársreikninga stofnunarinnar, en rekstur stofnunarinnar gekk vel á síðasta ári, auk þess sem upplýst er um það helsta sem gert var á stofnuninni á árinu 2010.

 

Forsíðumynd ársskýrslunnar er tekin að Fjallabaki.