Landmælingar Íslands

Ný INSPIRE skýrsla og yfirlit

Gudni — Tue, 11 Jun 2013 13:48:36 +0000

Um miðjan maí mánuð var lokið við samantektir um framvindu á innleiðingu INSPIRE tilskipunarinnar hér á landi. Um er að ræða reglubundnar skýrslur, annars vegar yfirlit (monitoring report) um stöðuna á gagnasettum hér á landi sem tengjast INSPIRE tilskipuninni (eða koma til með að verða hluti af grunngerðinni) og hins vegar samantekt á ensku og íslensku um framvindu og stöðu verkefnisins. Í samantektinni kemur m.a. fram að EFTA ríkin innleiða INSPIRE tilskipunina á grundvelli samningsins um Evrópska Efnahagssvæði en EFTA ríkin, þar með talið Ísland, fengu þriggja ára frest til að uppfylla INSPIRE kröfurnar. Þetta er því í fyrsta skipti sem skýrslum sem þessum er skilað inn til Evrópusambandsins fyrir hönd Íslands. Héðan í frá verður samantekt skilað á þriggja ára fresti en yfirliti gagnasafna árlega. Landmælingar Íslands hafa látið framkvæma þrjár kannanir um stöðu mála hvað varðar grunngerð landupplýsinga hér á landi. Meðal annars voru upplýsingar úr þessum könnunum notaðar við skýrslugerðina.

Skýrsla Yfirlit

Landmælingar Íslands hljóta jafnlaunavottun VR

jensina — Tue, 11 Jun 2013 12:25:21 +0000

Landmælingar Íslands hafa hlotið jafnlauavottun VR og er stofnunin fyrst íslenskra ríkisstofnana til að hljóta slíka vottun. Þar með hefur fengist staðfesting á því að búið sé að kerfisbinda launaákvarðanir, koma upp jafnlaunakerfi samkvæmt kröfum ÍST 85:2012 jafnlaunastaðalsins og að nú verði kerfisbundið fylgst með því hjá stofnuninni að starfsfólki sem vinnur sömu eða jafnverðmæt störf sé ekki mismunað í launum. Þessi faglega úttekt er er í góðu samræmi við þá vinnu sem unnin hefur verið í launa- og mannauðsmálum innan stofnunarinnar á undanförnum árum og staðfestir að sömu laun eru greidd fyrir jafnverðmæt störf.

Ólafía B. Rafnsdóttir, formaður VR, afhenti Magnúsi Guðmundssyni, forstjóra vottunarskírteinið við hátíðlega athöfn föstudaginn 7. júní 2013. Af því tilefni voru saman komnir starfsmenn Landmælinga Íslands ásamt fulltrúa Umhverfis- og auðlindaráðuneytisins, til þess að fagna þessum merka áfanga. Sjá nánar frétt á Heimasíðu VR

Á myndinni eru f.v. Ólafía B. Rafnsdóttir formaður VR, Jensína Valdimarsdóttir starfsmannastjóri LMÍ, Magnús Guðmundsson forstjóri LMÍ, Kjartan Ingvarsson frá umhverfis- og auðlindaráðuneytinu og Unnur Guðríður Indriðadóttir frá VR. Ljósm. Guðni Hannesson

IceCORS-stöð Landmælinga Íslands sett upp á Reykhólum

jensina — Fri, 07 Jun 2013 16:57:28 +0000

Landmælingar Íslands hafa sett upp IceCORS-mælistöð á Reykhólum en hún er hluti af kerfi sem nær yfir allt landið. Á Reykhólavefnum má sjá frétt um verkefnið og stutt viðtal við Þórarinn Sigurðsson mælingaverkfræðing.

Landmælingar Íslands „Stofnun ársins 2013″

jensina — Fri, 24 May 2013 18:00:52 +0000

Landmælingar Íslands urðu í fyrsta sæti í vali á „Stofnun ársins 2013“ í flokki meðalstórra stofnana (20-49 starfsmenn) en það var tilkynnt við hátíðlega athöfn á Hilton Nordica hótelinu í dag 24. maí 2013 að viðstöddum fjölda fólks. Þetta í annað sinn sem stofnunin hlýtur titilinn „Stofnun ársins“ og ber sú góða einkunn sem starfsmen Landmælinga Íslands gefa vinnustað sínum vitnisburð um góðan starfsanda, öfluga starfsmannastefnu og góða stjórnun vinnustaðarins. Starfsmenn Landmælinga Íslands hafa tekið þátt í þessari könnun frá upphafi og hefur stofnunin ætíð verið framarlega í flokki enda könnunin verið eitt af tækjum stofnunarinnar til að bæta starfsumhverfið.

Hjá Landmælingum Íslands sem eru með aðsetur á Akranesi stendur nú yfir vinna við innleiðingu á jafnlaunavottun VR. Vinnan er unnin samkvæmt nýjum íslenskum staðli (ÍST 85:2012) og gert er ráð fyrir að stofnunin fái vottun í byrjun júní nk. og verði fyrst íslenskra ríkisstofnana til að stíga það skref.

SFR – stéttarfélag í almannaþjónustu stóð nú í níunda sinn að vali á Stofnun ársins en hjá Landmælingum Íslands var könnunin gerð meðal allra starfsmanna óháð því í hvaða stéttarfélagi þeir eru.

Vefþjónusta fyrir spjaldtölvur

Sjonni — Fri, 24 May 2013 08:41:47 +0000

Við höfum tekið í notkun prufuútgáfu á spjaldtölvu vefþjónustu. Vefþjónustan hefur verið í prófun í dánokkurn tíma og hafa notendur verið ánægðir með þjónustuna. Við hvetjum alla sem nota spjaldtölvu eða snjallsíma til að prófa vefþjónustuna.

Við munum á næstunni bæta við fleiri þjónustum sem hægt verður að skoða í snjallsímum og spjaldtölvum.

Prufuþjónustuna er hægt að skoða með því að smella hér eða með því fara á fara á kortasjá-vefsíðuna okkar.

Háskólanemi skráir örnefni

jensina — Thu, 16 May 2013 10:38:47 +0000

Hjá Landmælingum Íslands hefur ávallt verið unnið ötullega að skráningu örnefna fyrst á kort og síðustu ár í gagnagrunn stofnunarinnar. Þar hefur samvinna við fólkið í landinu og sérfræðinga hjá nafnfræðisviði Stofnunar Árna Magnússonar í íslenskum fræðum ávallt verið í fyrirrúmi. Háskólanemar hafa einnig unnið við skráningu örnefna en á dögunum afhenti Þórdís Birna Lúthersdóttir landfræðinemi við HÍ Landmælingum Íslands lokaverkefni sitt í námskeiðinu LUK 2 (landfræðileg upplýsingakerfi 2). Lokaverkefni Þórdísar Birnu fólst í vinnu með örnefni í landi jarðarinnar Forsæludals í Húnavatnshreppi. Þórdís Birna vann með heimamönnum og nýtti sér þrjár örnefnaskrár sem voru til hjá Árnastofnun. Hún staðsetti örnefnin á loftmynd í ArcGIS með aðstoð Lúthers Olgeirssonar og Sigríðar Ragnarsdóttur.

Þórdís Birna útskrifast í júní með BS í landfræði og stefnir hún á framhaldsnám í landfræðilegum upplýsingakerfum sem m.a. eru notuð við að koma upplýsingum á framfæri, t.d. um örnefni, söguna í kringum þau, lýsingar og fl. Hún segir að nám erlendis sé heillandi kostur hvað það varðar.

Landmælingar Íslands hafa tekið verkefni Þórdísar Birnu inn í örnefnagrunn sinn en mikilvægt er að slík verkefni rati inn í samræmdan kortagrunn.

Um leið og stofnunin þakkar Þórdísi Birnu og heimildarmönnunum fyrir að deila verkefninu með fleirum er henni óskað velfarnaðar í námi og starfi í framtíðinni.

Þórdís Birna Lúthersdóttir

Fréttabréfið Kvarðinn er komið út

jensina — Wed, 15 May 2013 16:06:44 +0000

Annað tölublað Kvarðans, fréttabréfs Landmælinga Íslands, á árinu 2013 er komið út. Í blaðinu er meðal annars sagt frá nýrri þekju gervitunglamynda af Íslandi, uppfærðri örnefnaskráningu og hlutverki Landmælinga Íslands samkvæmt nýjum náttúruverndarlögum. Kvarðinn er aðeins gefinn út á rafrænu formi á heimasíðu Landmælinga Íslands og hann má finna með því að smella hér.

Dagur umhverfisins

jensina — Fri, 26 Apr 2013 14:31:11 +0000

Á sumardaginn fyrsta 25. apríl var Dagur umhverfisins og í tilefni þess ákvað starfsfólk Landmælinga Íslands að láta sitt ekki eftir liggja í því að bæta umhverfið. Starfsfólkið dreif sig út í góða veðrið í morgun 26. apríl, slóst í för með starfsfólki á Bæjarskrifstofu Akraneskaupstaðar og tíndi rusl í nærumhverfinu. Gengið var með stóra ruslapoka niður Stillholt, Kirkjubraut og alveg niður á Akratorg og allt rusl á umferðareyjum, meðfram runnum, grindverkum og víðar fjarlægt. Á meðfylgjandi myndum má sjá kampakáta starfsmenn sem voru að vonum ánægðir með framtakið.

Kosningavefsjá 2013

jensina — Tue, 23 Apr 2013 08:42:25 +0000

Landmælingar Íslands hafa opnað kosningavefsjá sem veitir landfræðilega sýn inn í kosningar. Til að skoða vefsjána smellið hér.

Kosningar og kort

jensina — Tue, 23 Apr 2013 08:28:14 +0000

Allmargar fyrirspurnir um kort er tengjast Alþingiskosningum 2013 hafa borist Landmælingum Íslands að undanförnu. Mest hefur verið spurt um kort sem sýna kjördæmi og upplýsingar varðandi stærð kjördæma. Starfsmenn Landmælinga hafa nú brugðist við þessum fyrirspurnun og gert vefsjá sem finna má á vef stofnunarinnar. Í vefsjánni sést hvernig kjördæmin skiptast og ef smellt er á kjördæmi birtist tafla sem hefur m.a. að geyma upplýsingar um fjölda framboða. Til þess að skoða Kosningavefsjá Landmælinga Íslands smellið hér